ამერიკის შეერთებული შტატების ელჩი საქართველოში, კელი დეგნანი პრეზიდენტი სალომე ზურაბიშვილის ინიციატივასთან დაკავშირებით აცხადებს, რომ ამერიკის შეერთებული შტატები მხარს დაუჭერს ნებისმიერ ინიციატივას, რომელიც პოლარიზაციის შემცირებას შეუწყობს ხელს.

"ჩემი შეხედულებით, პრეზიდენტმა ზურაბიშვილმა მართლაც გამოხატა სამიტზე დემოკრატიასთან დაკავშირებით საქართველოში შექმნილი სიტუაცია მისი შესანიშნავი შენიშვნებით, როგორც გამოწვევებზე, ასევე, შესაძლებლობებზე. მან მოუწოდა ინკლუზიური მმართველობისკენ, პოლარიზაციის შემცირებისკენ და დიალოგის დაწყებისკენ, რომელიც საქართველოში გაჯანსაღების პროცესს დაიწყებს.

ამერიკის შეერთებული შტატები მხარს დაუჭერს ნებისმიერ ინიციატივას, რომელიც ხელს შუწყობს პოლარიზაციის შემცირებას და რომელიც დაეხმარება იმ განხეთქილებების მოგვარებას, რომელიც ქვეყანას ბოლო წლების განმავლობაში ანადგურებდა.

მე ვფიქრობ, რომ ეს არის მნიშვნელოვანი შესაძლებლობა, რომელიც პრეზიდენტმა ზურაბიშვილმა წამოაყენა კონსტიტუციით ქვეყნის გამაერთიანებლის როლში. ჩვენ მხარს ვუჭერთ მსგავს ინიციატივებს. ამავე დროს, ჩვენ ვფიქრობთ, რომ მნიშვნელოვანია საქართველოს არჩეულმა ლიდერებმა პარლამენტში გააგრძელონ მუშაობა, რათა შემცირდეს პოლარიზაცია და ხელი შეუწყონ ინკლუზიურ მმართველობას", — ამბობს დეგნანი.

10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.