დეპუტატი სალომე სამადაშვილი პრეზიდენტ სალომე ზურაბიშვილს მიმართავს და მოუწოდებს, შეიწყალოს ყოფილი პრეზიდენტი, მიხეილ სააკაშვილი. ის ამბობს, რომ ეს იქნებოდა შერიგების ყველაზე ნათელი გზავნილი.

"მე მინდა რომ გამოვეხმაურო დღეს საქართველოს პრეზიდენტის ინიციატივას და მოვუწოდო მას ამ დარბაზიდან. მაშინ, როდესაც თქვენ ხედავთ, რომ ბატონი კობახიძე საუბრობს ისევ შურისძიებაზე, საუბრობს იმაზე, რომ უნდა გაქრეს საერთოდ პოლიტიკური სივრციდან რომელიმე პოლიტიკური პარტია, ვფიქრობ, რომ დღეს ყველაზე სწორი ნაბიჯი საქართველოს პრეზიდენტის მხრიდან, იმ ნახევარი მილიონი ადამიანისთვის, რომელიც, მაგალითად ხმას აძლევს კონკრეტულად ერთ პოლიტიკურ პარტიას, მისი მხრიდან ყველაზე ნათელი გზავნილი შერიგების თაობაზე იქნებოდა კონსტიტუციური პრეროგატივის გამოყენება და საქართველოს ყოფილი პრეზიდენტის მიმართ შეწყალების აქტის განხორციელება", — განაცხადა სალომე სამადაშვილმა.

10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

გაიგე მეტი: