ქართული ოცნების დეპუტატი, ირაკლი ზარქუა მიხეილ სააკაშვილის ინიციატივას ეროვნულ შერიგებაზე, "შტერულს" უწოდებს. ზარქუა ამბობს, რომ ექსპრეზიდენტის განცხადებების ფონზე, შერიგებაზე საუბარი საზოგადოების თვალში "მშვიდობის მანტიის" მოსხმას ემსახურება.

"ჩვეულებრივად ემსახურება ისევ და ისევ ვითომ, საზოგადოების თვალში მოისხან რაღაც მშვიდობის მანტია. სინამდვილეში, სააკაშვილის ტექსტები წაიკითხეთ აბა, რას ჰყვება. გამოვალთ, მაგათ ყველას ადგილს მივუჩენთ, აი, ეს არის. ვინც მაგათ მხარს უჭერთ, მათ ყველას დედას გიტირებთ — ეს არის შერიგება? ასე რომ, მე თქვენ გირჩევდით, რომ არ აყვეთ ამ შტერულ ინიციატივას", — ამბობს ის.

6 დეკემბერს მიხეილ სააკაშვილმა განაცხადა, რომ ბრძოლა გამძაფრდება და არ გაჩერდება ქართული ოცნების დამარცხებამდე. ალტერნატივად სააკაშვილი მმართველ პარტიას "გონს მოსვლას" და ეროვნულ შერიგებას სთავაზობს. მისი თქმით, "ეს ყველასთვის საუკეთესო გამოსავალია".

ამასთან, ექსპრეზიდენტმა დეკემბერში მასშტაბური პროტესტი დააანონსა. სააკაშვილის გათავისუფლების მოთხოვნით აქცია რუსთაველის მოედანზე 21 დეკემბერს დაიგეგმა.