ექსპრეზიდენტი, მიხეილ სააკაშვილი დეკემბერში დიდ აქციებს აანონსებს და აცხადებს, რომ მუდმივი წინააღმდეგობის კერების არსებობაა საჭირო. სააკაშვილი აღნიშნავს, რომ ქვეყანას "ფართო შეთანხმება" და "დიდი გადატვირთვა" სჭირდება.

სააკაშვილის თქმით, ბიძინა ივანიშვილი ახლა კატასტროფულ სიტუაციაშია, ასეთ ვითარებაში კი ის დამსჯელ რაზმებს აძლიერებს და კრიმინალს ახალისებს. ექსპრეზიდენტი ამბობს, რომ სხვადასხვა თემით ივანიშვილი ორი მთავარი თემისგან, რიგგარეშე არჩევნებისა და მისი გათავისუფლების საკითხისგან ცდილობს ყურადღების გადატანას.

"იგივე, რიგგარეშე არჩევნების თემაზე დაბნეულობის შემოსატანად შემოაგდო 2%-იანი ბარიერის თემა და ჩემს შემთხვევაში — საავადმყოფოში გადაყვანის. ასევე, იქირავა "ექსპერტები", რომელთა მთავარი თემაა, რომ თურმე, სააკაშვილის თემა ხელს უშლის ოპოზიციის ძირითად პროგრამას.

ახლა მისი მთავარი მოკავშირეა საახალწლო გოჭი და საცივი და ხალხის ამ თემებზე გადართვა. ამ ყველაფრით მას სურს, ტემპერატურის დაგდება, ფრუსტრაციის და პასიურობის დანერგვა. ამის პარალელურად, ემზადება გვარამიას, ხაზარაძის დასაჭერად და მედიის დასახურად", — აღნიშნავს ის.

სააკაშვილი ამბობს, რომ ოპოზიციამ ივანიშვილს უნდა უპასუხოს იმით, რომ ხალხს აუხსნან თუ რაზე თანხმდებიან. ექსპრეზიდენტის თქმით, შეთანხმების საკითხებია "ნამდვილი ადგილობრივი თვითმმართველობის არჩევნების" შემოატანა და "თავისუფლება ძალადობისგან".

ახლა, თბილისის საქალაქო სასამართლოში მიხეილ სააკაშვილის მიერ საზღვრის უკანონოდ გადაკვეთის საქმეზე პროცესი მიმდინარეობს, რასაც თავად არ ესწრება. ექსპრეზიდენტის განცხადებით, ამის მიზეზი ჯანმრთელობის მდგომარეობაა და ერთადერთი, რის გამოც სხდომაზე დასწრება სურდა, იმ ადამიანების გამხნევება და მხარდაჭერაა, რომლებიც მის გამო იჩაგრებიან.