ანასტასია შატალოვას ოჯახის ადვოკატი, პაატა შავაძე აცხადებს, რომ ქალის გარდაცვალების ფაქტზე გამოძიება ტენდენციურად მიმდინარეობს. მისი თქმით, ამის საფუძველს აძლევს ის, რომ გამოძიება არ ინტერესდება იმ მტკიცებულებებით, რომელსაც დაცვის მხარე აწვდის.

"მე მივაწოდე გამოძიებას სისხლის სამართლის საქმის ის მასალები, რომლებიც უკავშირდება ზურაბ ბერიძის მხრიდან შესაძლო ძალადობის ფაქტებს და რაზე ბათუმის საქალაქო სასამართლოში უკვე დაწყებულია წარმოება და ბერიძე ბრალდებულია. ვერც ამ კუთხით ვერ დავინახეთ დაინტერესება გამოძიების მხრიდან, რაც კიდევ უფრო გვიღრმავებს ეჭვებს, რომ ტენდენციურად მიმდინარეობს გამოძიება არის ვისიმე ქვენა ინტერესი, რომ არ დადგინდეს საბოლოოდ ჭეშმარიტება", — განაცხადა პაატა შავაძემ.

ზურაბ ბერიძის სავარაუდო ბრალეულობაზე საუბრობს ანასტასია შატალოვას დედა, სვეტლანა შატალოვაც. მისი თქმით, არსებობს მიმოწერები, სადაც ანასტასია წერს, რომ ეშინია არ მოკლას მისი შვილის მამამ.

"სულ მეუბნებოდა ანასტასია, რომ უთვალთვალებდნენ და ამბობდა, რომ ეს ზურაბი იყო. მას მტრები არ ჰყავდა. მკვლელობამდე ორი კვირით ადრე ვიყავი მასთან, თითქოს ყველაფერი ნორმალურად იყო. ამბობდა მხოლოდ იმას, რომ ზურაბი იყო მისი პრობლემა. ყველაფერი მასზე მიუთითებს. ფაქტია, რომ ამ მკვლელობის შედეგად ზურაბმა მიიღო ის, რაც სურდა — ბავშვი ახლა მასთანაა. ის დიდ ძალისხმევას და ფულს ხარჯავდა ბავშვის წასაყვანად", — აცხადებს სვეტლანა შატალოვა.

მას კითხვები აქვს გამოძიებასთანაც. ამბობს რომ სამართალდამცველები ინფორმაციას არ აწვდიან და ეუბნებიან მხოლოდ იმას, რასაც მედიიდან ისედაც იგებს.

ანასტასია შატალოვა 18 ოქტომბერს, თბილისში, საცხოვრებელ სახლთან მოკლეს. 19 ოქტომბერს მისი მკვლელობის საქმეზე სამი ადამიანი დააკავეს. 20 ოქტომბერს თბილისის საქალაქო სასამართლომ სამივე მათგან პატიმრობა შეუფარდა.

გაიგე მეტი: