ნაციონალური მოძრაობის წევრი, ლევან ბეჟაშვილი საკრებულოების ძველი შემადგენლობით ბიუჯეტების დამტკიცებას "ძალაუფლების მიტაცებას" უწოდებს და ამბობს, რომ ამ პროცესს აუცილებლად წაიღებენ სასამართლოებში. ამის შესახებ მან სპეციალურ ბრიფინგზე ისაუბრა.

"სახეზე გვაქვს შეთანხმებული მოქმედება ქართული ოცნების საარჩევნო შტაბისა და ცენტრალური საარჩევნო კომისიის. ამ პროცესში ცესკომ კიდევ ერთხელ შეასრულა არჩევნების შედეგების გამყალბებლის მთავარი როლი, ვინაიდან განზრახ და მიზანმიმართულად გააჭიანურა ახალი საკრებულოების მოწვევის თარიღი, მაშინ, როცა არჩევნების შედეგები ჯერ კიდევ შეჯამებული იყო 13 ნოემბერს და შესაძლებელი იყო, აქამდე დანიშნულიყო ახალი საკრებულოების სხდომის მოწვევის თარიღი და მათ განეხორციელებინათ უფლებამოსილება", — განაცხადა მან.

გუშინ, 26 ნოემბერს ზუგდიდსა და ბათუმში საკრებულოს სხდომების პარალელურად ხმაური იყო. ოპოზიცია ძველი საკრებულოს მიერ მომავალი წლის ბიუჯეტის განხილვას აპროტესტებდა. მიუხედავად მათი პროტესტისა, ორივე ქალაქში საკრებულოების ძველმა შემადგენლობებმა 2022 წლის ბიუჯეტები დაამტკიცეს.

პარტია საქართველოსთვის პოლიტსაბჭოს წევრი და დეპუტატი მიხეილ დაუშვილი ასევე მოუწოდებდა ხელისუფლებას, არ დაემტკიცებინა მუნიციპალური ბიუჯეტები ძველი საკრებულოს პირობებში. ის ამბობდა, რომ ხელისუფლება ცდილობს, ჩვეულ სტილში, ერთპიროვნულად, ახალი საკრებულოების შეკრებამდე მიიღოს გადაწყვეტილება.

ამაზე ისაუბრა ქართული ოცნების პოლიტსაბჭოს წევრმა, სოზარ სუბარმა და განაცხადა, რომ ძველი საკრებულოების მიერ მომავალი წლის ბიუჯეტის წინასწარ დამტკიცება მათი პოლიტიკური გადაწყვეტილება იყო. მიმდინარე პროტესტის ფონზე სუბარს მიაჩნია ისიც, რომ ეს "ყველაზე სწორი" და "განვითარებაზე ორიენტირებული" გადაწყვეტილებაა.