ლელოს ლიდერი, მამუკა ხაზარაძე საქართველოს ინტერესებისთვის ეროვნული კონსოლიდაციის მძლავრი პლატფორმის შექმნის ინიციატივით გამოდის. მისი თქმით, ქვეყანასა და რეგიონში ბოლო დრო განვითარებული მოვლენები ცხადყოფს, რომ ეს გადაუდებლად აუცილებელია.

"ბიძინა ივანიშვილის ქართული ოცნების მიერ წარმოებული პოლიტიკური პროცესი დიდი ხანია ეროვნულ ინტერესებთან წინააღმდეგობაში მოდის და ჩვენი ქვეყნის ეროვნულ სტრატეგიულ ხაზებს კვეთს. ამ ვითარებიდან გამომდინარე, საქართველოს ინტერესებისთვის გადაუდებლად მიმაჩნია ეროვნული კონსოლიდაციის, "ეროვნული უსაფრთხოებისა და ეკონომიკის" მძლავრი პლატფორმის შექმნა", — წერს ის Facebook გვერდზე.

ხაზარაძის თქმით, პლატფორმის ფარგლებში, საქართველოში აშშ-ის სამხედრო ობიექტები უნდა განლაგდეს, აშშ-სთან თავისუფალი ვაჭრობის ხელშეკრულება სწრაფად უნდა ამოქმედდეს და ეროვნული კონსოლიდაციისა და სუვერენიტეტის დაცვის აქტი უნდა იქნეს მიღებული, რათა "მტრული სახელმწიფოების სამსახურში მყოფი საქართველოს მოქალაქეები გამოვლინდნენ". ხაზარაძე საკითხით დაინტერესებულებს მრგვალ მაგიდასთან, მოსალაპარაკებლად იწვევს.

"გვჭირდება ეროვნული ძალების კონსოლიდაცია, დასავლელ პარტნიორებთან და მოკავშირეებთან ინტენსიური მუშაობა ამ მიზნების მისაღწევად და რეალურ ცხოვრებაში განსახორციელებლად. საქართველოს აქვს შანსი გახდეს ძლიერი, ეროვნულ ფასეულობებზე დაფუძნებული თანამედროვე სახელმწიფო, რომელიც მიმზიდველი იქნება ცივილიზებული სამყაროსთვის, როგორც სანდო მოკავშირე და პარტნიორი", — ამბობს ის.