ნაციონალური მოძრაობის ლიდერის, ნიკა მელიას განცხადებით, ქართულმა ოცნებამ, იუსტიციის მინისტრის, რატი ბრეგაძის "გამოყვანით" მარცხი აღიარა. მელიამ ასევე თქვა, რომ ეს "მარცხი" არ აკმაყოფილებთ, რადგან "რეჟიმი არსად არ წასულა.

"მოვა დრო, როდესაც ვიტყვით, თუ რას ვაპირებდით დღეს აქ. ქართულმა ოცნებამ, არ ვიცი, ეს გაიგო, თუ არ გაიგო, მაგრამ მე მგონია, რომ დღეს 3 საათზე, რომ გამოიყვანეს იუსტიციის მინისტრი, ამით, ამ ეტაპზე მარცხი აღიარა. აღიარა მარცხი, მაგრამ ეს მხოლოდ ის მარცხია, რომელიც ჩვენ არ გვაკმაყოფილებს, იმიტომ, რომ ეს რეჟიმი ჯერ არსად არ წასულა. მაგრამ მარცხი რომ აღიარა და უკან რომ დაიხია, ეს არის ფაქტი", — თქვა მელიამ.

მელიამ ასევე აღნიშნა, რომ ის, რის გაკეთებასაც დღეს აპირებდნენ ბოლო 33 წლის განმავლობაში ქვეყანას არ უნახავს. მელიამ ასევე თქვა, რომ, შესაძლებელია, მმართველ გუნდში ეს გეგმა გაიგეს და ამის გამო მიიღეს ეს გადაწყვეტილება.

იუსტიციის მინისტრმა, რატი ბრეგაძემ სპეციალური ბრიფინგი გამართა და ექსპრეზიდენტს გორის ჰოსპიტალში გადაყვანა შესთავაზა. მისი მტკიცებით, გორის ჰოსპიტალი არის ადგილი, სადაც მიხეილ სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც მის მიერ იქნება მიღებული გადაწყვეტილება, რომ იგი თანახმაა, გადავიდეს გორის სამხედრო ჰოსპიტალში და შეწყვიტოს შიმშილობა.