საქართველოს სახალხო დამცველს, უჩა ნანუაშვილს მიაჩნია, რომ ქალთა უფლებრივი და გენდერული თანასწორობის მიმართულებით ქვეყანაში მძიმე მდგომარეობაა და არსებითად არ შეცვლილა. ამის შესახებ ნანუაშვილმა თავის 2016 წლის ანგარიშში ასახა.

"კვლავ კრიტიკულად დაბალია ქალთა მონაწილეობის მაჩვენებელი გადაწყვეტილების მიღების პროცესში. პრობლემას წარმოადგენს სახელმწიფოს მიერ გატარებულ ღონისძიებებში ინტერსექციური მიდგომების ნაკლებობა, რაც თავის მხრივ, სხვადასხვა გამოცდილების მქონე ქალთა პრობლემატიკის ასახვას აბრკოლებს და მათი მოწყვლადობის ხარისხს ზრდის," - აღნიშნულია ანგარიშში.

ამავე ანგარიშის მიხედვით, ქალთა მიმართ ძალადობის და ოჯახში ძალადობის საკითხებზე გაზრდილი მიმართვიანობის ფონზე უფრო მეტად გამოიკვეთა სისტემური ხარვეზები, რაც რეაგირების ეფექტიანობისა და პრობლემის აღმოფხვრის პროცესში მნიშვნელოვანი დაბრკოლებაა.

პრობლემებს შორის ნანუაშვილი ადრეულ ასაკში და ბავშვთა ქორწინების შესახებ საზოგადოების დაბალი ცნობიერებასა და გულგრილ დამოკიდებულებასაც გამოყოფს. მას მიაჩნია, რომ ამით, ხშირად, არასრუწლოვანთა საუკეთესო ინტერესების უგულებელყოფა და თანასწორუფლებიანობის დარღვევა ხდება.