ცენტრი ემპათია აცხადებს, რომ ჯანდაცვის სამინისტროს წარმომადგენლებმა პარიტეტულ კონსილიუმში მონაწილეობა შესთავაზეს. ემპათია კონსილიუმში ჩართვაზე მზად ყოფნას გამოთქვამს, თუმცა იმ შემთხვევაში, თუ ის დაუყოვნებლივ შეიქმნება.

მათი თქმით, იქიდან გამომდინარე, რომ მათ არ აქვთ დეტალური ინფორმაცია ექსპრეზიდენტის ჯანმრთელობის მდგომარეობასთან დაკავშირებით და ამასთანავე, სააკაშვილთან არ უშვებენ მის პირად ექიმს, ნიკოლოზ ყოფშიძეს, აუცილებელია, რომ სააკაშვილის ჯანმრთელობის მდგომარეობაში გარკვევა დაუყოვნებლივ მოხდეს პარიტეტული სამედიცინო კონსილიუმის მიერ.

"მივმართავთ ჯანდაცვის სამინისტროს და ყველა შესაბამის უწყებას, თუ თქვენი ნამდვილი მიზანია მიხეილ სააკაშვილის ჯანმრთელობაზე ზრუნვა, გთხოვთ უახლოესი რამდენიმე საათის განმავლობაში მოაგვაროთ პარიტეტული კონსილიუმის შექმნის ფორმალური მხარე და დღესვე მიეცეს შესაძლებლობა პარიტეტულ კონსილიუმს განახორციელოს ვიზიტი მიხეილ სააკაშვილთან, რათა მოხდეს მისი ჯანმრთელობის მდგომარეობის შეფასება და მე-18 დაწესებულებაში არსებული ტექნიკური ინფრასტრუქტურის და ადამიანური რესურსების პოსტ-შიმშილობის მართვის შესაძლებლობასთან შესაბამისობის დადგენა", — აღნიშნავენ ცენტრში.

მათივე განცხადებით, 18 ნოემბერს კონსილიუმმა ხმათა უმრავლესობით უნდა მიიღოს გადაწყვეტილება, თუ სად და რა პირობებში უნდა გაგრძელდეს მიხეილ სააკაშვილის მკურნალობა და როგორი იქნება მისი შიმშილობის შემდგომი მკურნალობის გეგმა. ცენტრის თქმით, აღნიშნული გადაწყვეტილება უნდა იყოს სავალდებულო შესასრულებლად და დაუყოვნებლივ აღსრულდეს.

ემპათიაში აღნიშნავენ იმასაც, რომ თუ შესაბამისი სახელმწიფო უწყებები მათ განცხადებას უახლოეს რამდენიმე საათში არ გამოეხმაურებიან, მაშინ ისინი ჩათვლიან, რომ ჯანდაცვის სამინისტროს შეთავაზება მიზნად ისახავს არა სააკაშვილის ჯანმრთელობის მდგომარეობაზე ზრუნვას, არამედ აღნიშნულის იმიტაციას და დროის გაყვანას, რაში მონაწილეობის მიღებაზეც ემპათია უარს ამბობს.

16 ნოემბერს ექსპრეიდენტის სამედიცინო მომსახურების მონიტორინგის მიზნით სახალხო დამცველმა ექიმთა კონსილიუმი შექმნა. ჯგუფის მიზანია შეაფასოს რამდენად შეესაბამება ექსპრეზიდენტის ჯანმრთელობის უფლების დაცვას N18 სამკურნალო დაწესებულება ამჟამად და იქნება თუ არა ამ დაწესებულებაში ადეკვატური სამედიცინო სერვისის მიწოდება შესაძლებელი პატიმრის მიერ ხანგრძლივი შიმშილობის შეწყვეტის შემდეგ, როგორც ამას ადამიანის უფლებათა ევროპული სასამართლო 10 ნოემბრის გადაწყვეტილებით ითხოვს.