სპეციალურ პენიტენციურ სამსახურში აცხადებენ, რომ ექსპრეზიდენტ მიხეილ სააკაშვილის სიცოცხლეს ამ დროისათვის საფრთხე არ ემუქრება. მათივე თქმით, გუშინ პაციენტმა ყველა დანიშნული მედიკამენტი მიიღო და შესაბამისი ლაბორატორიული მონაცემები გაუმჯობესდა. პენიტენციურ სამსახურში, ასევე, ამბობენ, რომ ექსპრეზიდენტის ჯანმრთელობის მდგომარეობა მუდმივი კონტროლის ქვეშ არის.

"შესაბამისი ლაბორატორიული მონაცემები გაუმჯობესდა, მათ შორის კალიუმის დონე, რომელიც ნორმას მიუახლოვდა. დღეისათვის პაციენტი ასრულებს ყველა დანიშნული მედიკამენტის მიღებას. აქვე დავძენთ, რომ მისი მდგომარეობა ამ ეტაპზე არის სტაბილური. ძირითადი სასიცოცხლო მონაცემები, როგორც არის, პულსი, წნევა, სატურაცია, სისხლში გლუკოზის დონე ნორმის ფარგლებშია. პაციენტ მიხეილ სააკაშვილის ჯანმრთელობის მდგომარეოაბ არის მუდმივი კონტროლის ქვეშ და დღეის მდგომარეობით მის სიცოცხლეს საფრთხე არ ემუქრება", — აცხადებენ პენიტენციურში.

უწყება, ასევე, განმარტავს, რომ მე-18 პენიტენციურ დაწესებულებაში მოშიმშილე პაციენტების მკურნალობა და ასევე, შიმშილობის შემდგომი რეაბილიტაცია მუდმივად მიმდინარეობს.

პენიტენციური სამსახური ირწმუნება, რომ მე-18 დაწესებულებაში არსებობს ყველა რესურსი, სათანადო ინფრასტრუქტურა, აღჭურვილობა და სერტიფიცირებული, კვალიფიციური პერსონალი, რათა მოშიმშილე პაციენტების მკურნალობა მოხდეს.

ნაციონალური მოძრაობის ერთ-ერთი ლიდერმა, ხატია დეკანოიძემ, რომელიც გუშინ ციხის საავადმყოფოში მიხეილ სააკაშვილის სანახავად იმყოფებოდა თქვა, რომ ექსპრეზიდენტი რამდენიმე დღეა არ იღებს წამლებს და სუსტადაა.

მიხეილ სააკაშვილი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში 8 ნოემბერს გადაიყვანეს. სააკაშვილი 48-ე დღეა შიმშილობს.

სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.