ნაციონალური მოძრაობის ერთ-ერთი ლიდერი, ხატია დეკანოიძე, რომელიც ცოტა ხნის წინ იმყოფებოდა ციხის საავადმყოფოში მიხეილ სააკაშვილის სანახავად აცხადებს, რომ ექსპრეზიდენტი რამდენიმე დღეს არ იღებს წამლებს და სუსტადაა. დეკანოიძეს თქმით, სისუსტე გამოიხატება იმაში, რომ მას უჭირს წონასწორობის დაცვა.

"უჭირს ნამდვილად გადაადგილება და სიარული, სუსტად არის. ეს სისუსტე წონასწორობის დაცვის სირთულეს წარმოადგენს მისთვის. მითხრა, რომ არ იღებს წამლებს რამდენიმე დღეა, რომელიც აუცილებელია მისი სიცოცხლის პარამეტრების შესანარჩუნებლად. მითხრა, რომ წნევის ცვალებადობაა ძალიან სერიოზული, რაც გულისხმობს იმას, რომ შესაძლებელია ჰიპერტონული კრიზი დაემართოს და ჰქონდა რამდენჯერმე უკვე. რა თქმა უნდა, ფერი აქვს ძალიან მძიმე. ანუ, ყვითელი და კიდევ უფრო ფერმკრთალი. გაცილებით უფრო მხნედ იყო წინა დღეებში, როდესაც მე მოვინახულე", — განაცხადა ხატია დეკანოიძემ.

მისი ინფორმაციით, გრძელდება შეურაცხმყოფელი შეძახილები მიმდებარე დაწესებულებების ფანჯრებიდან სააკაშვილის მისამართით. დეკანოიძე ამბობს, რომ სააკაშვილი ძალიან წუხს ელენე ხოშტარიას გამო. ასევე, წუხს, რომ უკრაინის სახალხო დამცველი არ შეუშვეს მის სანახავად თუმცა, იმედი აქვს, რომ შეძლებს საქართველოს სახალხო დამცველის მიერ შექმნილ ექსპერტთა ჯგუფის წევრებთან შეხვედრას.

ხატია დეკანოიძის შემდეგ სააკაშვილის სანახავად ციხის საავადმყოფოში საქართველოს სახალხო დამცველი ნინო ლომჯარია და მისი ინიციატივით შექმნილი სამედიცინო ექსპერტთა ჯგუფი მივიდა. ისინი ორ საათზე მეტია პენიტენციური სამსახურის მე-18 დაწესებულების ტერიტორიაზე იმყოფებიან, თუმცა უცნობია მისცეს თუ არა სააკაშვილთან შეხვედრის უფლება.

მიხეილ სააკაშვილის სანახავად არ შეუშვეს უკრაინის სახალხო დამცველი, ლუდმილა დენისოვა. ამ თემაზე დასმული კითხვის პასუხად, იუსტიციის მინისტრი რატი ბრეგაძე აცხადებს, რომ გლდანის #18 დაწესებულება სამკურნალოა და თავს იკავებენ იქ შეუშვან ის ადამიანები, ვისაც საქართველოს კანონმდებლობით ამის უფლება არ აქვს.