ჯანდაცვის სამინისტროსთან ექსპრეზიდენტ მიხეილ სააკაშვილის მულტიფუნქციურ კლინიკაში გადაყვანა კიდევ ერთხელ მოითხოვეს. ლელოს წევრებმა უწყებასთან კოვიდ პანდემიის შედეგად ადამიანების გარდაცვალების მზარდი სტატისტიკაც გააპროტესტეს და ამაში ჯანდაცვის მინისტრი ეკატერინე ტიკარაძე დაადანაშაულეს და მისი გადადგომაც მოითხოვეს.

"ეს არ არის მხოლოდ ციხის კარების მიკეტვა, ეს არის ევროპისათვის კარის მიკეტვა, მიკეტვის მცდელობა, მაგრამ არავინ მიაკეტინებს რუსულ ოცნებას ევროპისა და ჩვენი დასავლელი მეგობრების კარს. ვითხოვთ, რომ ადამიანი არ მოკლან, მეტს არაფერს", — განაცხადა ლელოს წევრმა, ლევან სამუშიამ.

"დღეში 80 კაცს კლავთ, ოცნება გვიწყოს გენოციდს, სიკვდილის მინისტრი, მიშას კლავთ, ელენეს კლავთ", — აცხადებენ აქციის მონაწილეები.

მიხეილ სააკაშვილი 47-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

16 ნოემბრის მონაცემებით, საქართველოში კორონავირუსის 5 204 ახალი შემთხვევა დადასტურდა, გამოჯანმრთელდა 4 785, ხოლო გარდაიცვალა — 83 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 791 115-ს. ვირუსს ჯამში ემსხვერპლა 11 140, ხოლო გამოჯანმრთელდა 727 184 ადამიანი.