დეპუტატი ხათუნა სამნიძე შინაგან საქმეთა სამინისტროს განცხადებას ეხმაურება, რომლის მიხედვითაც ენმ-ს მიერ ორგანიზებულ აქციაზე, საჭიროების შემთხვევაში, პროპორციულ ძალას გამოიყენებენ. სამნიძემ ბიუროს სხდომაზე დასვა კითხვა, რატომ არ ეყო უწყებას ძალა 5 და 6 ივლისის ძალადობრივი კონტრაქციების დროს მოძალადეების შესაჩერებლად.

"დღეს 700 განცხადება რომ გავრცელდა შინაგან საქმეთა სამინისტროსი, ძალას გამოვიყენებთ თუ საჭირო გახდაო, 5 და 6 ივლისს, მაშინ რატომღაც არ ეყოთ ძალის გამოყენება, რომ მოძალადეები გაეჩერებინათ.

ძალიან გთხოვთ, ვიყოთ ობიექტურები და ქვეყანაზე ფიქრს გთხოვთ, მეტს არაფერს", — განაცხადა სამნიძემ.

ამ წუთებში ნაციონალური მოძრაობა ექსპრეზიდენტ მიხეილ სააკაშვილის მხარდამჭერ აქციას მართავს. მოქალაქეები ავლაბრის მეტროსთან შეიკრიბნენ და მსვლელობით სანაპიროსკენ გაემართნენ. დაგეგმილია საავტომობილო მოძრაობის გადაკეტვაც. აქციის პარალელურად სანაპირობაზე მობილიზებულია საპოლიციო ძალები და წყლის ჭავლის მანქანა.

აქციის გადყებამდე შსს-მ გაავრცელა განცხადება, სადაც ამბობენ, რომ ტრანსპორტის სავალი ნაწილის გადაკეტვა დაუშვებელია და ამ წესის დარღვევა გამოიწვევს პასუხისმგებლობას ადმინისტრაციულ სამართალდარღვევათა კოდექსის შესაბამისად. უწყების განცხადებით, აღნიშნული აქციის გაცხადებული მიზანი თბილისში სატრანსპორტო კოლაფსის გამოწვევაა. შსს-ს თანახმად, საჭიროების შემთხვევაში, საზოგადოებრივი წესრიგის აღდგენის მიზნით, კანონით გათვალისწინებულ პროპორციულ ძალასა და სპეციალურ საშუალებებს გამოიყენებენ.

ენმ-ს შეფასებით, შინაგან საქმეთა სამინისტროს დღევანდელი განცხადება მიმართულია დაგეგმილი აქციის ხელშესაშლელად და წარმოადგენს მშვიდობიანი დემონსტრანტების დაკავებების დაანონსებას.