პაატა ბურჭულაძე ექსპრეზიდენტ მიხეილ სააკაშვილის სამოქალაქო კლინიკაში გადაყვანის მოთხოვნით შიმშილობას იწყებს. მისი თქმით, ის უცხოეთში იმყოფება, ხვალ საქართველოში ჩამოვა და იმავე დღეს დაიწყებს შიმშილობას.

"მეგობრებო, მე ვიმყოფები უცხოეთში და იმ საშინელების ყურება, რაც საქართველოში ხდება აქედან კიდევ უფრო რთულია. ამიტომ, გადავწყვიტე ხვალ წამოვიდე და ჩემი ქვეყნის გვერდით დავდგე ამ მძიმე ჟამს. თუკი ახლა არ დავანახეთ მთელ მსოფლიოს, რომ ის რაც ხდება რამდენიმე გაველურებული ადამიანის პოზიციაა და არა ქართველი ხალხის, არის საშიშროება, რომ სამუდამოდ დაიკეტოს ჩვენთვის ცივილიზაციის კარი. ამიტომ მივიღე მტკიცე გადაწყვეტილება, რომ ჩამოსვლისთანავე გამოვაცხადო შიმშილობა იქამდე, ვიდრე საქართველოს მესამე პრეზიდენტი არ იქნება გადაყვანილი მულტიფუნქციურ კლინიკაში! ვიდრე არ იქნება მისი სიცოცხლე გადარჩენილი", — წერს ბურჭულაძე Facebook გვერდზე.

ბურჭულაძემ საკუთარ კოლეგებსა და კულტურის წარმომადგენლებას მიმართა და აღნიშნა, რომ შეუძლიათ მას შიმშილობაში შეუერთდნენ.

"ხელოვანებო, ჩემო კოლეგებო, მწერლებო, მხატვრებო, ვისაც სურვილი და შესაძლებლობა გაქვთ შემომიერთდით, თავისუფლება და მოყვასის სიყვარული ის მთავარი ფასეულობებია, რაც ოდითგან გვაერთიანებდა ყოველ ჩვენგანს! ჩვენ ვერ გავხდებით საქართველოს მესამე პრეზიდენტის მკვლელობის თანამონაწილენი!" — წერს ის.

დღეს, 14 ნოემბერს მიხეილ სააკაშვილის სამოქალაქო კლინიკაში გადაყვანის მოთხოვნით პარლამენტის შენობაში შიმშილობა ნაციონალური მოძრაობის 9 დეპუტატმა გამოაცხადა. შიმშილობა დაიწყო ნაციონალური მოძრაობის კიდევ ერთმა წევრმა, გიორგი ბარამიძემაც. ამავე მოთხოვნით, საკანონმდებლო ორგანოში უკვე მე-14 დღეა დროას დამფუძნებელი, ელენე ხოშტარია შიმშილობს.