ახლახან ნეტფლიქსის ყველაზე პოპულარული კორეული სერიალის, კალმარის თამაშის რეჟისორმა მეორე სეზონის გამოსვლა დააანონსა. ეს სიახლე ფანებისთვის მოულოდნელი ნამდვილად არ იყო: ცოტა ხნის წინ კალმარის თამაში ნეტფლიქსის ყველაზე პოპულარული სერიალი გახდა — ის გამოსვლიდან 25 დღეში 111-მა მილიონმა ადამიანმა ნახა. პოპულარულობის გარდა, მეორე სეზონის გამოსვლა პირველი სეზონის დასასრულმაც განაპირობა.

პირველი სეზონის ბოლოს სასიკვდილო თამაშებში გამარჯვებული გი-ჰუნი თმას წითლად იღებავს, ბარგს ალაგებს და ამერიკაში, შვილთან გამგზავრებას აპირებს. თვითმფრინავისკენ მიმავალი მეტროში თამაშების ერთ-ერთ წარმდგენს დაინახავს, რომელიც ამჯერად მონაწილეობაზე სხვის დათანხმებას ცდილობს. ნანახით აღშფოთებული გი-ჰუნი თვითმფრინავში არ ჯდება და კამერისკენ გაბრაზებული მოემართება.

გულშემატკივრების ნაწილმა პირველი სეზონის დასასრული გააკრიტიკა: მათ უნდოდათ, რომ გი-ჰუნს ფული აეღო და შვილთან ერთად ბედნიერად ეცხოვრა. სერიალის რეჟისორმა, ჰვან დონგ-ჰიუკმა ახალ ინტერვიუში ფანებს გაუმხილა, რომ თავდაპირველად სწორედ მსგავს დასასრულს განიხილავდა.

"სხვათა შორის, დასასრულის ორ ვერსიაზე ვმსჯელობდით. ალტერნატიული დასასრულის მიხედვით, გი-ჰუნი თვითმფრინავში ჯდება და ქვეყანას ტოვებს. მეორეში კი, რა თქმა უნდა, ტრიალდება და კამერისკენ მოემართება. ჩვენ საკუთარ თავებს გამუდმებით ვეკითხებოდით, სწორი იქნებოდა თუ არა, რომ გი-ჰუნს წასვლა გადაეწყვიტა, ოჯახი მოენახულებინა და ბედნიერება ეპოვა? იყო თუ არა ეს სწორი გზა იმისთვის, რომ ის კითხვა თუ გზავნილი გადმოგვეცა, რომელსაც სერიალით ვცდილობდით?" — ამბობს რეჟისორი.

საბოლოოდ, სერიალის შემქმნელებმა ჩათვალეს, რომ საჭირო კითხვების დასმისა და მათზე პასუხების ძიების პროცესისთვის გი-ჰუნის დარჩენა აუცილებელი იყო.

"ჩვენ დავასკვენით, რომ სასურველ კითხვებს ვერ დავსვამდით, თუ ის თვითმფრინავში ავიდოდა. კითხვა, რომელზეც პასუხი გვჭირდება, შემდეგია: რატომაა სამყარო ისეთი, როგორიც არის? ამ კითხვაზე პასუხის გაცემა ან მისი დასმა მხოლოდ იმ შემთხვევაში იყო შესაძლებელი, თუ გი-ჰუნი შემოტრიალდებოდა და კამერისკენ წამოვიდოდა. სწორედ ასე მივიღეთ სერიალის დასასრული", — ამბობს რეჟისორი.

როგორც ჩანს, იმ კითხვებისა და პასუხების მოძებნა, რომლებზეც რეჟისორი საუბრობს, გი-ჰუნთან ერთად სერიალის ახალ სეზონში კიდევ ერთხელ მოგვიწევს. მიუხედავად იმისა, რომ რეჟისორს ჯერჯერობით არც სცენარი აქვს ბოლომდე მოფიქრებული და ვერც ახალი სეზონის გამოსვლის თარიღს აკონკრეტებს, აშკარაა, რომ წინ დაუვიწყარი სანახაობა გველის.

ამავე თემაზე: