ჯანდაცვის სამინისტროსთან მიმდინარე აქციაზე ერთი ადამიანი შეუძლოდ გახდა. ის ტერიტორიიდან სასწრაფო სამედიცინო დახმარებამ გაიყვანა.

ადგილზე მყოფი მედიების ინფორმაციით, მოქალაქეებს საპროტესტო წარწერის გაკეთება უნდოდათ, რის გამოც პოლიციელებმა ერთი ადამიანი დააკავეს, აღნიშნული პირი კი სამართალდამცავების შეჩერებას ცდილობდა, რა დროსაც შეუძლოდ გახდა.

მიხეილ სააკაშვილის სამოქალაქო კლინიკაში გადაყვანის მოთხოვნით 3 სხვადასხვა ადგილას აქცია იმართება. აქტივისტები ჯანდაცვისა და იუსტიციის სამინისტროებთან, ასევე, სახელმწიფო უსაფრთხოების სამსახურის შენობასთან არიან შეკრებილები. პოლიცია პროტესტის მონაწილეებს აკავებს.

საპატრულო პოლიციის დეპარტამენტის უფროსის, ვაჟა სირაძის თქმით, სუს-თან აქტივისტების დაკავების მიზეზი ისაა, რომ სახელმწიფო დაწესებულების შენობის ბლოკირება კანონით აკრძალულია. თუმცა, აქციის მონაწილეთა ნაწილი პოლიციამ არათუ უწყების წინ, არამედ შენობის მოპირდაპირე მხარეს, ტროტუარზე დააკავა.

დღესვე იგეგმება კიდევ ერთი აქცია, თუმცა ნაციონალური მოძრაობის თავმჯდომარემ, ნიკა მელიამ ადგილი არ დაასახელა. მისი განმარტებით, ყოველდღე იქნება ისეთ საპროტესტო ლოკაცია, რომელსაც წინასწარ არ გაამხელენ. მისივე თქმით, თუ სააკაშვილს სასამართლო სხდომაზე მიიყვანენ, მაშინ 11-საათიანი აქციების შემდეგ, საქალაქოსთანაც შეიკრიბებიან.