საიას თავმჯდომარე, ნიკა სიმონიშვილი აცხადებს, რომ დეპუტატის კითხვა ვერ გახდება დამატებითი უფლებამოსილება რომელიმე უწყებისთვის, რომ რაიმე პერსონალური ინფორმაცია გაასაჯაროვოს. ასე აფასებს ის იუსტიციის მინისტრის, რატი ბრეგაძის მიერ გავრცელებულ ინფორმაციას, რომ მესამე პრეზიდენტი, მიხეილ სააკაშვილი ფაფებსა და წვენებს იღებს.

"პარლამენტის რეგლამენტი და დეპუტატის შეკითხვა არ არის დამატებითი უფლებამოსილება რომელიმე უწყებისთვის, რომ რაიმე ინფორმაცია გაასაჯაროვოს. დეპუტატის შეკითხვის არსებობის შემთხვევაშიც კი, რა თქმა უნდა, საჯაროვდება მხოლოდ ის ინფორმაცია, რომელიც არ არის კონფიდენციალური, ანუ მათ შორის, პერსონალური მონაცემებით", — განაცხადა სიმონიშვილმა ფორმულას ეთერში.

გუშინ, 5 ნოემბერს რატი ბრეგაძემ განაცხადა, რომ მიხეილ სააკაშვილი გარკვეული დროის შემდეგ ფაფებისა და ნატურალური წვენების მიღებას დათანხმდა. მისივე მტკიცებით, მესამე პრეზიდენტი იღებს ექიმების მიერ გამოწერილ მედიკამენტებსაც. იუსტიციის მინისტრის თქმით, ინფორმაციას მხოლოდ იმიტომ ასაჯაროვებდა, რომ აღნიშნულზე უკვე უპასუხეს ერთ-ერთი დეპუტატის კითხვას და "ეს ინფორმაცია ისეც საჯარო გახდება". აღსანიშნავია, რომ სააკაშვილზე სადეპუტატო კითხვით მინისტრს ადამიანის უფლებათა კომიტეტის თავმჯდომარემ, მიხეილ სარჯველაძემ მიმართა.

სააკაშვილი უკვე 37-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს. ამ ეტაპზე სააკაშვილი უარს ამბობს ექიმების კონსილიუმთან თანამშრომლობაზე.