ქართული ოცნების თავმჯდომარე ირაკლი კობახიძე ირწმუნება, რომ მოშიმშილე ექსპრეზიდენტი მიხეილ სააკაშვილი ციხეში საკვებს იღებს. მისივე მტკიცებით, ის ციხეში 3 ლიტრ ლიმონათს სვამს. ამასთან კობახიძე აღნიშნავს, რომ სააკაშვილი უსაფუძვლოდ შიმშილობს.

"ვიცი, რომ ეს კაცი ჭამს და სვამს და ამას მართლა მთელი ციხე ლაპარაკობს. დანარჩენზე ალბათ შესაბამისი უწყებები გასცემენ ყველას პასუხს", — განაცხადა კობახიძემ იმედის ეთერში.

ჟურნალისტმა, ასევე, აღნიშნა: "დანამდვილებით ვერაფერს ვიტყვით, მაგრამ მისი თანაგუნდელები, მაგალითად, ნიკა გვარამია ერთ-ერთ ეთერში ამბობდა, რომ თუკი მას ლიმონათს ასმევენ და ეს თუკიც ისე იყო ნათქვამი, რომ, როგორც ჩანს მასაც ჰქონდა ეს ინფორმაცია, მავნებელია მისი ჯანრთლეობისთვის", რაზეც კობახიძემ უპასუხა.

"3 ლიტრი ლიმონათი რომ დავლიო, მეც გავხდები ალბათ ცუდად. რას უზამ კაცს, 3 ლიტრი ლიმონათი უნდა და სვამს, ვერაფერს ვერ უზამ, პატიმრის უფლებაა ესეც", — თქვა კობახიძემ.

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 35 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს.