პენიტენციური დაწესებულების სამსახურის საქმიანობის შემაჯამებელი ანგარიშის მიხედვით, 2020 წელს სამედიცინო მომსახურება სამოქალაქო კლინიკაში 500-ზე მეტმა პატიმარმა მიიღო.

ანგარიშში ნათქვამია, რომ 2019 წლის ბოლოსთვის, გეგმიური სტაციონარული მომსახურება სამოქალაქო სექტორის კლინიკაში 585 პატიმარს ესაჭიროებოდა, რომელთაგან 500 მათგანის შემთხვევაში, რიგში ყოფნის 4-თვიანი ვადა დარღვეული იყო, თუმცა, 2020 წლის აგვისტოში ყველა პატიმარმა სტაციონარული მომსახურება მიიღო.

"2020 წლის აგვისტოს მდგომარეობით, ყველა პატიმარმა მიიღო სტაციონარული სამედიცინო მომსახურება და ე.წ. რეფერალურის რიგი განულდა. ეს შედეგი მიღწეული იქნა ფინანსების, ლოჯისტიკისა და ადამიანური რესურსის ეფექტიანი მენეჯმენტით", — წერია ანგარიშში.

მიხეილ სააკაშვილის სამოქალაქო ჰოსპიტალში არგადაყვანის არგუმენტად სახელმწიფო ასახელებს იმას, რომ მნიშვნელოვანია, ყველა პატიმარი თანაბარ პირობებში იყოს. პენიტენციური სამსახური და მთავრობა, საჭიროების შემთხვევაში, ექსპრეზიდენტის მხოლოდ გლდანის ციხის მე-18 სამედიცინო დაწესებულებაში მოთავსებაზეა თანახმა.

მანამდე, ერთი დღით ადრე სახალხო დამცველმა, ნინო ლომჯარიამ თქვა, რომ იუსტიციის სამინისტრომ სააკაშვილისთვის ალტერნატიული სამედიცინო დაწესებულება უნდა შეარჩიოს, რადგან დაწესებულება სრულად არ შეესაბამება ექიმთა კონსილიუმის რეკომენდაციებს. ასევე, არსებობს რისკები ექსპრეზიდენტის უსაფრთხოებაზეც.

ამასთან, იუსტიციის მინისტრი, რატი ბრეგაძე აცხადებს, რომ ციხის საავადმყოფოს შეუძლია მოშიმშილე პაციენტის მიღება და მისი ჯანმრთელობის მართვა. მისივე თქმით, მიხეილ სააკაშვილის უსაფრთხოება იქნება სრულად დაცული და უწყება მაქსიმალურად ეცდება, რომ გატარდეს ყველა საჭირო ღონისძიება, რომელიც აუცილებელია "როგორც ამ კონკრეტული, ისე სხვა პატიმრების უსაფრთხოებისთვის".

მიხეილ სააკაშვილის ადვოკატმა, ნიკა გვარამიამ 24 ოქტომბერს საჯაროდ მიმართა სახალხო დამცველს და სთხოვა, შეესწავლა ე.წ. ციხის საავადმყოფოს შესაბამისობა C კატეგორიის, მულტიფუნქციური კლინიკის სტანდარტებთან. გარდა მე-18 დაწესებულების არასათანადო აღჭურვისა, გვარამიას თქმით, იქ პრობლემური იქნება ექსპრეზიდენტის უსაფრთხოებაც. მისი თქმით, ციხის საავადმყოფოში ხელისუფლება გეგმავს იმიტირებულ ბუნტს, რომელიც დასრულდება სააკაშვილის ლიკვიდაციით. აღნიშნულ ინფორმაციაზე დამატებითი დეტალების მისაღებად გვარამიასთან შეხვედრას გეგმავს იუსტიციის სამინისტროს გენერალური ინსპექციის გამომძიებელი.

გარდა ამისა, გუშინვე ექსპრეზიდენტის ექიმმა, ნიკოლოზ ყიფშიძემ თქვა, რომ ციხის ჰოსპიტალის გარდა, სააკაშვილი ნებისმიერი კლინიკაში გადაყვანაზე თანახმაა.