მიხეილ სააკაშვილის პირადი ექიმის, ნიკოლოზ ყიფშიძის განცხადებით, ექსპრეზიდენტი თანახმაა, რომ ნებისმიერ სამოქალაქო საავადმყოფოში გადაიყვანონ. მისივე თქმით, ის კატეგორიულ უარს, მხოლოდ გლდანის მე-18 პენიტენციური დაწესებულების კლინიკაში გადაყვანაზე აცხადებს.

"შიმშილობას არ წყვეტს. არ უნდა არავითრ შემთხვევაში რომ გადაიყვანონ გლდანის სამედიცინო დაწესებულებაში. თანახმაა ჰოსპიტალიზაციის საქალაქო სექტორში, მნიშვნელობა არ აქვს რომელი საავადმყოფო იქნება, ეს არის მისი პოზიცია", — ამბობს ყიფშიძე, რომელმაც სააკაშვილი რამდენიმე წუთის წინ მოინახულა.

მისივე თქმით, ექსპრეზიდენტის მედიკამენტოზურმა მკურნალობამ შედეგი გამოიღო და მისი ჯანმრთელობის მდგომარეობა ისეთივეა, როგორიც გუშინ.

"სააკაშვილის ჯანმრთელობის მდგომარეობა ზუსტად ისეთივეა, როგორც გუშინ იყო, ეს ნიშნავს, რომ გადასხმამ და მედიკამენტოზურმა მკურნალობამ კარგი შედეგი გამოიღო, ნუ შედარებით, ასე რომ ყველაფერი კარგად არის დღეს", — აღნიშნავს ექიმი.

გუშინ, 23 ოქტომბერს სააკაშვილის პირადმა ექიმმა, ნიკოლოზ ყიფშიძემ განაცხადა, რომ კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ. ჟურნალისტმა მას ჰკითხა, რა პოზიცია ჰქონდა სამოქალაქო საავადმყოფოში გადაყვანაზე იუსტიციის სამინისტროს მაშინ, როცა ყიფშიძე უწყების წარმომადგენლებს შეხვდა. ექიმმა თქვა:

"მაშინ ჰქონდა პოზიცია ის, რომ იმსჯელებენ, რომელ საავადმყოფოში გადავიყვანოთ, სამოქალაქო საავადმყოფოში. ლაპარაკი იმ დროს გლდანის ციხის საავადმყოფოზე არ იყო".

მოგვიანებით, აღნიშნულზე იუსტიციის მინისტრმა, რატი ბრეგაძემ განაცხადა, რომ ეს ინფორმაცია სიმართლეს არ შეესაბამება, ექსპრეზიდენტის სამოქალაქო კლინიკაში გადაყვანა არ განიხილება და "ტყუილს მოკლე ფეხები აქვს".

დღეს, 24 ოქტომბერს, პრემიერმინისტრმა, ირაკლი ღარიბაშვილმა განაცხადა, რომ "პატიმარ სააკაშვილს თუ დასჭირდება დამატებითი კვლევების ჩატარება, ყველა პირობა არის შექმნილი ციხის საავადმყოფოში, ეს არის ჩვენი გადაწყვეტილება, რომელიც არ გადაიხედება".

მიხეილ სააკაშვილი პირველ ოქტომბერს დააკავეს. ის 24 დღეა, რაც შიმშილობს.