ქართული ოცნების თავმჯდომარე, ირაკლი კობახიძე ამბობს, რომ ნაციონალურმა მოძრაობამ არჩევნების მე-2 ტურისთვის "ხულიგნების მთელი კოჰორტა შემოგვთავაზა". მისივე თქმით, რუსთავის მერობის კანდიდატი, დავით კირკიტაძე არის "ენმ-ის რეჟიმის სახე".

"დავით კირკიტაძემ თავის დროზე, როცა ახალი დეპუტატი იყო, გახსოვთ ნაცმოძრაობის რეჟიმის დროს, ჯერ სცემა დაცვის თანამშრომელს, შემდეგ ჰქონდა ანალოგიური ინციდენტი, როცა გუბერნატორი იყო — სცემა ერთ-ერთ მსაჯს საფეხბურთო მატჩის დროს. გუშინ სცემა ერთ-ერთ კონკრეტულ მოქალაქეს, რუსთავის მოქალაქეს, რომელიც იყო სამწუხაროდ მისული მათ ოფისთან. არ ვიცი, ამას ცალკე შეფასება სჭირდება.

მაგრამ კიდევ ერთხელ ვნახეთ, რა ტიპის კანდიდატებთან გვაქვს საქმე ნაცმოძრაობის სახით. კირკიტაძე ხულიგანი, უგულავა ხულიგანი, მელია ხულიგანი. ხულიგნების მთელი კოჰორტა შემოგვთავაზა არჩევნების მე-2 ტურისთვის, მათ შორის, ნაციონალურმა მოძრაობამ. რა თქმა უნდა, ისინი მიიღებენ შესაბამის პასუხს", — თქვა ირაკლი კობახიძემ.

გუშინ, 24 ოქტომბერს დავით კირკიტაძემ განაცხადა, რომ ენმ-ის რუსთავის ოფისის თანამშრომლებს ქართული ოცნების 20-მდე აქტივისტი თავს დაესხა. მისი თქმით, მძიმედ ორი, ხოლო, ნაკლებად მძიმედ ერთი ადამიანია დაშავებული. შინაგან საქმეთა სამინისტრომ მომხდარზე გამოძიება სისხლის სამართლის კოდექსის 126-ე მუხლით დაიწყეს, რაც ძალადობას გულისხმობს. ამასთან, მოგვიანებით გავრცელდა კადრები, სადაც ჩანს, რომ დაპირისპირებაში ჩაერთო კირკიტაძეც და ოფისთან მისულ ერთ-ერთ ადამიანს დაარტყა.