პარტია გირჩის ერთ-ერთი ლიდერის, იაგო ხვიჩიას განცხადებით, მიუხედავად იმისა, რომ საპარლამენტო სხომას ნაციონალური მოძრაობის არცერთი დეპუტატი არ ესწრება, ქართული ოცნება საქმეზე საუბრის ნაცვლად, მხოლოდ მათზე ლაპარაკობს. ხვიჩია ამბობს, რომ "ოცნებისთვის" ეს ხელსაყრელი არაა, რადგან მათ პარტიაშიც არიან ენმ-ის ყოფილი წევრები.

"მიუხედავად იმისა, რომ არცერთ ე.წ ნაცი არ ზის დარბაზში, უმრავლესობის წევრებს "ნაცების" გარდა სხვაზე არ ულაპარაკიათ, გესმით? წარმოდგინეთ, რა მდგომარეობაშია ზოგადად, ჩვენი ფსიქიკა, ნერვები, საერთოდ სად ვცხოვრობთ, მაშინ როდესაც პარტიის საერთოდ არცერთი წარმომადგენელი დარბაზში არ ზის და ეძებენ ყოფილ ნაციონალური მოძრაობის წევრებს, რომ წამოაძახონ ნაციონალური მოძრაობის წევრობა, ამას ვაკეთებთ ამწუთას. მემგონი, ეს თქვენც არ გაწყობთ, თქვენს წევრებშიც მოიძებნება ასეთი ხალხი", — აცხადებს ხვიჩია.

მისივე თქმით, ენმ "შატალოზეა", ქართული ოცნება კი პარლამენტში, თუმცა, საქმეზე არასდროს საუბრობს. ხვიჩიას განცხადებით, მას ბევრ მათგანთან ადამიანური ურთიერთობა აქვს, თუმცა, არაერთი მცდელობის მიუხედავად, მას რეალურ საკითხზე საუბარში არცერთი არ აჰყვა.

"ბევრთან მოვსულვარ და რაც თქვენთვის საინტერესო საკითხი უნდა ყოფილიყო, იმაზე მილაპარაკია, არცერთზე არ მიგვრძნია, ვინმე ამყოლოდა. ფეხბურთელები არ ამყოლიხართ ფეხბურთზე, კალათბურთელები — სპორტზე, დანარჩენი ადამიანები — არაფერზე [...] არ მინდა ამ კლოუნადაში მონაწილეობა, სადაც ქოც–ნაცების გარჩევის მეტი არაფერი არ ხდება, როდის უნდა დავიწყოთ რამეზე ფიქრი", — თქვა ხვიჩიამ.

საპარლამენტო სხდომა პარლამენტში დღეს პოლიტიკური განცხადებებისა და ურთიერთბრალდებების ფონზე წარიმართა.

ამავე თემაზე: