"ახლა მეორე ტურები დაიწყო და მინდა გითხრათ, რატომ გაბოროტდით ასე. რა არის ეს ზიზღის ენა, ეს ძალადობა?" — ასე მიმართა ლელოს ლიდერმა, მამუკა ხაზარაძემ ქართული ოცნების დეპუტატებს. მისი თქმით, წინა ხელისუფლების მმართველობის გახსენების დრო აღარ არის, რადგან მიხეილ სააკაშვილი უკვე დაკავებულია, საუბარი კი მხოლოდ ერთადერთზე, სამართლიან სასამართლოზეა საჭირო.

"ვის ასმენინებთ ამას, თქვენი ოჯახის წევრებს, მთელს საქართველოს, ნახევარ ამომრჩეველს, რომელსაც არ მოსწონს თქვენი პოლიტიკა? რას ემსახურება, ეს ხომ სახელმწიფოებრივი არ არის, ეს ხომ არ არის ჩვენს ხვალინდელ დღეზე ორიენტირებული. როდემდე უნდა ვიძახოთ 9-წლიანი ამბავი, როცა დაჭერილი გყავთ ეს პრეზიდენტი, დაჭერილია, ერთადერთი რაც არის საჭირო, სამართლიანი სასამართლო ამ ქვეყანაში, არამარტო ამ კაცისთვის, არამედ თითოეული თქვენგანისთვის, ჩემთვის, ბადრისთვის, ყველასთვის, ვისაც უსამართლოდ ასამართლებთ.

რუსთაველს მოვიშველიებ, აქ ბევრს უყვარს ხოლმე ლექსები, არის ასეთი რამე კოკაში შინა რაცა დგას, იგივე წარმოდინდების, დაუფიქრდით რამხელა სიბრძნეა ამაში. მიუხედავად იმისა, რომ ეს ძალიან დიდი სიბრძნეა მე ნამდვილად არ მჯერა, რომ ეს სიბოროტე თქვენს გულებში არის, არ მწამს მე ამის, რომ თქვენ ბოროტი ადამიანები ხართ", — თქვა ხაზარაძემ.

არჩევნებამდე 2 კვირით ადრე მმართველმა გუნდმა ექსპრეზიდენტ მიხეილ სააკაშვილისა და ნაციონალური მოძრაობის დისკრედიტაციის მიზნით ვიდეო გამოაქვეყნა. მათ ოფიციალურ, ვერიფიცირებულ ფეისბუქგვერდზე ატვირთულ ვიდეორგოლში გამოყენებულია ის კადრები, რომლებსაც სხვადასხვა დროს ტროლ-გვერდები ენმ-ის დისკრედიტაციისთვის იყენებდნენ. ქართულმა ოცნებამ ამ კლიპს დავასრულოთ ნაცები დაარქვა და და #ნაცობასირხვილია დააჰეშთეგა.

მიხეილ სააკაშვილი პირველ ოქტომბერს დააკავეს. ის უკვე 19 დღეა შიმშილობს.