საქართველოში კორონავირუსის ვაქცინის ე.წ. ბუსტერ დოზის ჩატარება 50 წელს ზემოთ ასაკისა და ქრონიკული დაავადებების მქონე მოქალაქეებში დაუშვეს. ჯანდაცვის მინისტრის მოადგილის, თამარ გაბუნიას განცხადებით, ე.წ. ბუსტერის გაკეთება შესაძლებელი იქნება, როგორც Pfizer-ის, ასევე, ჩინური ვაქცინებით, თუმცა AstraZeneca-თი — არა.

"ქრონიკული დაავადებების, მათ შორის, ორგანოგადანერგილები და სხვადასხვა იმუნური სისტემის შესუსტებით მიმდინარე დაავადებების მქონე პირებს, რომლებსაც უკვე ჩატარებული აქვთ ორი დოზა ნებისმიერი ვაქცინით, არის ეს AstraZeneca, Sinopharm, Sinovac თუ Pfizer, მეორე აცრის ჩატარებიდან 6 თვეში შეუძლიათ, ჩაიტარონ ბუსტერ დოზა.

ბუსტერი დოზა ტარდება, როგორც Pfizer-ის ვაქცინით, ასევე, Sinopharm ან Sinovac-ის ვაქცინით, თუ პირი მანამდე აცრილი იყო Sinopharm-ითა და Sinovac-ით. მაგრამ ბუსტერი დოზა არ ტარდება AstraZeneca-ს ვაქცინით, თუმცა AstraZeneca-ს ვაქცინით აცრილ პირებს ბუსტერი დოზა შეუძლიათ, ჩაიტარონ Pfizer-ის ვაქცინით", — განაცხადა მან.

გაბუნიას თქმით, ვინც ბუსტერი დოზის კრიტერიუმებს აკმაყოფილებს, უკვე ოქტომბრის ბოლოს შეძლებს მის გაკეთებას.

"პირველი კოჰორტა, ვისაც მოუწევს ბუსტერი დოზის ჩატარება, უკვე ოქტომბრის ბოლოს იქნება მზად იმისთვის, რომ თუ ის აკმაყოფილებს კრიტერიუმებს და მისთვის ნაჩვენებია ბუსტერი დოზის ჩატარება, მათ ეს გააკეთონ. ასევე, ეს, რა თქმა უნდა, შეეხება სამედიცინო პერსონალსა და მაღალი რისკის პროფესიონალებს, ვინც მუშაობს დახურული ტიპის დაწესებულებებში", — ამბობს ის.

ამასთან, განისაზღვრა ე.წ. დამატებითი დოზის გაკეთება მათთვის, ვინც რაიმე მიზეზით — სასწავლო, ბიზნეს და სამოგზაურო მიზნებისთვის — მიდის ქვეყანაში, სადაც ვაქცინაცია Pfizer-ით არის სავალდებულო. გაბუნიას თქმით, მათაც შეეძლებათ, მეორე დოზიდან 28 დღეში დამატებით Pfizer-ის ვაქცინის გაკეთება.

"დამატებითი დოზის ჩატარება შეუძლიათ იმ პირებს, რომლებიც აცრილები არიან Sinopharm-ის ან Sinovac-ის ორი დოზით, თუმცა სასწავლო ან ბიზნეს მიზნებისთვის, ან რაიმე მიზნით მოგზაურობის შემთხვევაში იმ ქვეყანაში, სადაც ისინი მიემგზავრებიან არის მოთხოვნები დაწესებული კონკრეტულად Pfizer-თან მიმართებაში, ასეთ დროს პირმა შეიძლება ჩაიტაროს ვაქცინაცია Sinopharm-ისა და Sinovac-ის აცრის მეორე დოზიდან უკვე 28 დღეში, თუმცა ამისთვის ამცრელ დაწესებულებაში უნდა წარმოადგინოს მოგზაურობის დამადასტურებელი დოკუმენტი და მიზნობრიობა, რატომ სჭირდება მას დამატებითი დოზით აცრა", — აცხადებს ის.

რაც შეეხება 12-დან 15 წლამდე ბავშვებში აცრას, გაბუნიას თქმით, ეს რეკომენდებულია მხოლოდ ქრონიკული დაავადების მქონე ბავშვებისთვის, ხოლო მათ, ვინც უცხოეთში გაიკეთა პირველი დოზა, მეორე დოზას Pfizer-ის ვაქცინით საქართველოში შესთავაზებენ.

ჯანდაცვის სამინისტროს ინფორმაციით, ბუსტერ დოზებზე, ასევე, 12-დან 15 წლის ჩათვლით ბავშვების აცრისთვის რეგისტრაცია სამედიცინო დაწესებულებებშია შესაძლებელი. მათივე თქმით, ბუსტერ დოზად შესაძლებელია გამოყენებული იყოს იგივე ან სხვა ვაქცინა, თუ დაშვებულია ვაქცინის მწარმოებლის მიერ.