ირანელი ქალი თეირანის მეჰრაბადის აეროპორტში სასულიერო პირს დაუპირისპირდა. მას შემდეგ რაც ქალს სასულიერო პირმა ჰიჯაბის არ ტარების გამო შენიშვნა მისცა, ქალმა მას ჩალმა მოხადა და ჰიჯაბის ნაცვლად შემოიხვია. ინციდენტი, რომელიც სოციალურ მედიაში გავრცელდა, კიდევ ერთი მაგალითია ირანში მკაცრი კანონების წინააღმდეგ ქალების ბრძოლისა და "გენდერულ აპართეიდის".

ვიდეო სოციალურ ქსელში ირანელმა ჟურნალისტმა მასიჰ ალინეჯადმა გაავრცელა.

"თეირანის მეჰრაბადის აეროპორტში მამაცი ქალი სასულიერო პირს დაუპირისპირდა, რომელიც მას ჰიჯაბის არ ტარების გამო ავიწროებდა. გაბედული აქტით მას ჩალმა მოხადა და თავად გაიკეთა, როგორც შარფი, რითაც ჩაგვრა წინააღმდეგობად აქცია. წლების განმავლობაში, სასულიერო პირები აცხადებდნენ, რომ მათი ჩალმა და სამოსი წმინდა და ხელშეუხებელია, მაგრამ ამ ქალის გენდერული აპართეიდით გამოფიტულმა და გაბრაზებულმა პროტესტის ფორმამ დაარღვია ეს მითი", — წერს ალინეჟადი თავის პოსტში.

ინციდენტმა ინტერნეტში დიდი ვნებათა ღელვა გამოიწვია, ბევრმა ქალის ქმედებები შეაქო, როგორც ძლიერი პროტესტი ირანში გენდერული ჩაგვრის წინააღმდეგ. თუმცა, ირანის სახელმწიფოსთან დაკავშირებული მედია საშუალებები აცხადებენ, რომ ქალს "ფსიქოლოგიური პრობლემები" აქვს და იგი მცირე ხნით დააკავეს შემდეგ კი გაათავისუფლეს.