საქართველოს პრემიერ-მინისტრი, გიორგი კვირიკაშვილი მიიჩნევს, რომ ე.წ. მოსმენების კანონთან დაკავშირებით პრეზიდენტის ვეტოს გათვალისწინების შემთხვევაში თვისობრივი ცვლილებები ვერ მოხდებოდა. ამიტომ, გეგმავენ, რომ კანონი ვეტოს დადებამდე არსებული ვერსიით მიიღონ.

"ეს არის ძალიან მნიშვნელოვანი კანონპროექტი, რომელიც არის მნიშვნელოვანი ქვეყნის უსაფრთხოებისთვის. ის სტრუქტურები, რომელზეც არის საუბარი ისედაც მთავრობის დაქვემდებარებაშია," - ამბობს გიორგი კვირიკაშვილი.

საქართველოს პრეზიდენტმა, გიორგი მარგველაშვილმა ე.წ. მოსმენების კანონს ვეტო 20 მარტს დაადო. ვეტოს დადების მიზეზები მან ასე განმარტა:

  1. ეს არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი და შესაბამისად, ეწინააღმდეგება ამ საკითხზე საკონსტიტუციო სასამართლოს გადაწყვეტილებას;
  2. მეორე ეს არის კანონპროექტში გაუმართლებელი და არაპროგნოზირებადი ხარჯები, რომელსაც ეს კანონპროექტი აკისრებს საკომუნიკაციო კომპანიებს.

პრეზიდენტის საპარლამენტო მდივანმა, ანა დოლიძემ კი აღნიშნა, რომ სააგენტო, რომელსაც მოსმენებზე წვდომა ექნება, სახელმწიფო უსაფრთხოების სამსახურის ნაცვლად, საქართველოს პრემიერ-მინისტრს უნდა ექვემდებარებოდეს.