სახალხო დამცველის, ნინო ლომჯარიას განცხადებით, 59 ოპოზიციური კანდიდატის მიმართ განხორციელდა სავარაუდო ზეწოლა და დაშინება. ომბუდსმენის აპარატის ინფორმაციით, 52 პირი არის ყოფილი პრემიერმინისტრის, გიორგი გახარიას პარტია საქართველოსათვის წარმომადგენელი, 6 — ერთიანი ნაციონალური მოძრაობის, ხოლო ერთი მესამე ძალა — სტრატეგია აღმაშენებლის.

"მიმდინარე წინასაარჩევნო პერიოდი განსაკუთრებით გამოირჩეოდა ოპოზიციური კანდიდატებზე სავარაუდო ზეწოლის მასშტაბით. ჩვენ მივიღეთ არაერთი ინფორმაცია კანდიდატობასა და პასიურ საარჩევნო უფლებაზე უარის თქმის იძულების თაობაზე. სახალხო დამცველის აპარატის ხელთ არსებული ინფორმაციით 59 ოპოზიციური კანდიდატის მიმართ განხორციელდა სავარაუდო ზეწოლა და დაშინება, მათი მხრიდან კანდიდატობაზე უარის თქმის მიზნით.

შედეგად, აღნიშნულმა პირებმა რამდენიმე გამონაკლისის გარდა განცხადებები დაწერეს კანდიდატურის მოხსნის თაობაზე. ჩვენი ინფორმაციით ამ 59 პირიდან 52 კანდიდატი არის პარტია საქართველოსათვის წარმომადგენელი, 6 ერთიანი ნაციონალური მოძრაობის და ერთი მესამე ძალა — სტრატეგია აღმაშენებლის", — აღნიშნა ნინო ლომჯარიამ.

ომბუდსმენმა ასევე ისაუბრა, პოლიტიკური შეხედულებების გამო სამსახურიდან გათავისუფლებისა და სამსახურებრივად შევიწროების ფაქტებზე. ამ შემთხვევაში ომბუდსმენის აპარატმა 69 პირი გამოავლინა. ლომჯარიას თქმით, ამ პირთა უმრავლესობამ სახალხო დამცველის წარმომადგენლებთან საუბრისას მიზეზად ყოფილი პრემიერმინისტრის, გიორგი გახარიას პარტიის წევრებთან კავშირები დაასახელა.

"სამსახურებრივი ზეწოლის და გათავისუფლების ყველაზე მეტი შემთხვევა დაფიქსირდა სამეგრელოში, აჭარასა და შიდა ქართლში. დასაქმებულები გაათავისუფლეს ასევე შსს-ს აპარატიდან, მუნიციპალური სამსახურებიდან და სხვადასხვა მუნიციპალიტეტის სიპებიდან, აიპებიდან და იყო ასევე ერთ-ერთი შემთხვევა კერძო დაწესებულებიდან გათავისუფლების თაობაზე", — თქვა ლომჯარიამ.

ნინო ლომჯარიამ ასევე თქვა, რომ გამოვლინდა 5 ძალადობრივი ინციდენტი და ამომრჩევლის სავარაუდო მოსყიდვის 5 სავარაუდო შემთხვევა. სახალხო დამცველს ასევე მიმართეს საბავშვო ბაღებსა და საჯარო სკოლებში დასაქმებულთა პირების შესახებ, პერსონალური მონაცემების უკანონო დამუშავების მაღალი ალბათობის თაობაზე. მისი თქმით, ერთ-ერთ შემთხვევაში, დაადგენს დისკრიმინაცია, რადგან დირექტორს იმის გამო არ გაუგრძელეს ხელშეკრულება, რომ მისი შვილი ერთ-ერთი ოპოზიციურ პარტიასთან იყო დაკავშირებული.