საქართველოს პარლამენტის თავმჯდომარეს, კახა კუჭავას მიაჩნია, რომ არ შეიძლება ყველაფერზე პირველი რეაქცია თანამდებობის დატოვების მოთხოვნა იყოს. მას ჟურნალისტებმა სუს-ის უფროსის, გრიგოლ ლილუაშვილის გადადგომის მოთხოვნაზე ჰკითხეს, რაც დღის წესრიგში დოკუმენტების გავრცელების შემდეგ გახდა. კახა კუჭავას აზრით, ჯერ გამოძიება უნდა ჩატარდეს და მასალების ავთენტურობა დადგინდეს.

"ძალიან ადეკვატურია იმის თქმა, რომ უნდა დაველოდოთ გამოძიებას, რომ პირველ რიგში დადგინდეს ავთენტურობა. დღეს არის რეალურად იმის საშუალება, ეს მასალა გამოყენებული იყოს სხვადასხვა მიზნებისთვის, სხვადასხვა სპეკულაციებისთვის. ავთენტურობა უნდა დადგინდეს. [...]

სამწუხაროდ, იმ რეალობის წინაშე ვდგავართ ბოლო პერიოდში განსაკუთრებით, თუ რამე ხდება, ყველაფერზე პირველი რაც არის, თანამდებობის დატოვების მოთხოვნა არის. არ შეიძლება ყველაფერზე იყოს რეაქცია პირველი, დატოვოს თანამდებობა, სანამ ჯერ არც ვიცით, რეალობა რაში მდგომარეობს. ამიტომ გამოძიების დადგენის შემდეგ იქნება შესაბამისი ზომები მიღებული ყველა კანონდამრღვევის მიმართ, თუ ასეთი ფაქტი დადასტურდა", — თქვა კახა კუჭავამ.

დღეს, 27 სექტემბერს სავარაუდოდ სუს-დან გამოჟონილი ინფორმაციის შესახებ კომენტარი გააკეთა უწყების ხელმძღვანელმა, გრიგოლ ლილუაშვილმაც. "მე რა შუაში ვარ?" — ასე უპასუხა კითხვას, გავრცელებულ ფაილებთან დაკავშირებით დაიბარეს თუ არა გამოკითხვაზე.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგეთ მეტი გავრცელებულ ჩანაწერებზე: