წლის დასრულებამდე რამდენიმე თვით ადრეც შეგვიძლია ვთქვათ, რომ 2021 ერთმანეთზე უფრო მოულოდნელი, მასშტაბური, შემზარავი თუ დაძაბული მოვლენებით იყო სავსე და მათ შორის ერთ-ერთი ყველაზე ხმაურიანი საქმე ბრიტნი სპირსის მეურვეობას შეეხებოდა.

ბევრმა პირველად აღმოაჩინა, რომ ბრიტნი სპირსი ცამეტი წელია, სასამართლოს მიერ დანიშნული კანონიერი მეურვეობის ქვეშაა, რის გამოც მას თითქმის მთლიანად შეზღუდული აქვს პირადი თავისუფლება და ისეთი გადაწყვეტილებების დამოუკიდებლად მიღებაც კი, რაც მის ჯანმრთელობასა და კარიერას ეხება.

თავისუფლება ბრიტნის — მაინც რა ხდება პოპის პრინცესის თავს

ფანები დიდი ხნის განმავლობაში ამტკიცებდნენ, რომ პოპვარსკვლავი არასათანადო მოპყრობის მსხვერპლი იყო სასამართლოს მიერ დანიშნული მეურვის მხრიდან — ჯეიმი სპირსისგან, რომელიც ასევე ბრიტნის მამაა.

ყველაფერი კიდევ უფრო შოკის მომგვრელი მას შემდეგ გახდა, რაც მომღერალმა სასამართლოზე ღიად ისაუბრა დამამცირებელი, არაჰუმანური და შემზარავი გამოცდილების შესახებ.

სწორედ ამ საქმის გარემოებების დეტალურ გამოძიებას გვთავაზობს ნეტფლიქსის ახალი დოკუმენტური ფილმით Britney vs Spears, რომლის ტრეილერიც სულ ცოტა ხნის წინ გამოქვეყნდა:

"მინდა, რომ უბრალოდ ჩემი ცხოვრება დავიბრუნო" — გვესმის ბრიტნის სიტყვები ტრეილერის დასაწყისში.

ამ დოკუმენტურ ფილმზე რეჟისორი ერინ ლი კარი წლების განმავლობაში მუშაობდა, შესაბამისად, დიდი ალბათობით, წინ ამ საქმის შესახებ დეტალური და ანალიტიკური გამოძიება გველოდება.

აღსანიშნავია, რომ ბრიტნი სპირსის შესახებ დოკუმენტური ფილმი გასულ წელსაც გამოვიდა, სახელწოდებით Framing Britney Spears, რომელმაც ასევე მოახერხა, რომ უამრავი მაყურებელი მიეზიდა, თუმცა ის მეურვეობის საკითხთან ერთად დიდწილად მომღერლის მიმართ მედიის მხრიდან გამოჩენილ არაეთიკურ გადაწყვეტილებებს ეხებოდა.

ნეტფლიქსის ახალი დოკუმენტური გამოძიება მზის სინათლეს 28 სექტემბერს იხილავს.