კულტურის მინისტრი, თეა წულუკიანი გავრცელებულ ფაილებში მისი საუბრის ნამდვილობას არ ადასტურებს. ამის შესახებ მან რუსთავი 2-ის ეთერში ისაუბრა და აღნიშნა, რომ გამოძიების მიერ შედეგის დაყენება "სასიცოცხლოდ მნიშვნელოვანია".

"მე ვერ ვიცანი, ეს საუბარი. ქალბატონი, დედა ანასტასია წასულია ქვეყნიდან ბევრი წელია და მე მასთან მაქვს ხოლმე საუბარი, მაგრამ ეს საუბარი ვერ ვიცანი. მე გამოვრიცხავ, რომ ეს არის რეალობა, აქედან გამომდინარე. გამოძიების მიერ შედეგის დაყენება არის სასიცოცხლოდ მნიშვნელოვანი ყველასთვის, არა მხოლოდ იმ სახელი და გვარებისთვის, ვინც სახელდება, არამედ სახელმწიფო უსაფრთხოების სამსახურისთვის, რომელზეც მიმდინარეობს ორკესტრირებული შტურმი და მიზანი არის ერთი — გაირკვეს, არის თუ არა, ეს ნამდვილად, რეალურად შემდგარი საუბრების გადატანა ქაღალდზე. ჩემს შემთხვევაში დაასახელეთ მონაზონი და ეს ასე არ არის, არ ვადასტურებ ამ საუბარს", — განაცხადა მან.

გავრცელებული ფაილებში არის ინფორმაცია თეა წულუკიანის შესახებაც. კერძოდ, 2015 წლით დათარიღებული ჩანაწერების მიხედვით, საპატრიარქოს წარმომადგენლები, მონაზონ ანასტასიას აბრალებენ, რომ იგი გიორგი მარგველაშვილთან და თეა წულუკიანთან კავშირებს იყენებს იმ მიზნით, რათა ნორვეგიელმა სასულიერო პირებმა საქართველოს საპატრიარქოს გვერდის ავლით შეძლონ საქართველოს მოქალაქეობის მიღება. ამასთან, ჩანაწერების მიხედვით, მონაზონ ანასტასიას სურდა მიწის შეძენა, რის შესახებაც წულუკიანს აცნობა. ფაილებში ვკითხულობთ:

"მონაზონ ანასტასიას სიტყვებით, თეა წულუკიანი მას დაპირდა დახმარებას და სამომავლოდ ისეთი პიროვნებების მოძიებას, რომლებიც დაინტერესდებიან ახალქალაქში არსებული მიწის ფართობის ათვისებით და მასზე გარკვეული პროექტების განხორციელებით".

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგეთ მეტი გავრცელებულ ჩანაწერებზე: