ტეხასელი კაცი, რომელიც რუსულ არმიას შეუერთდა მთავრობისგან "პატივისა" და პრივილეგიების მისაღებად, მოტყუებული აღმოჩნდა — ის რუსეთ-უკრაინის ომის წინა ხაზზე გაგზავნეს.

ამერიკელი დერეკ ჰაფმანი ფიქრობდა, რომ იდეალური გამოსავალი იპოვა: ოჯახი ტეხასიდან რუსეთში გადაიყვანა "ტრადიციული ღირებულებებისა" და "ლგბტ პროპაგანდისგან" დაცვის მიზეზით. რუსეთის მოქალაქეობის სწრაფად მისაღებად ჰაფმანმა სამხედრო სამსახურში გაწევრიანება გადაწყვიტა, რადგან ფიქრობდა, რომ რუსულ არმიაში საკუთარი სპეციალობით, შემდუღებლად იმუშავებდა.

მაგრამ სამკვირიანი სწავლების შემდეგ ჰაფმანი მალევე უკრაინის ფრონტის წინა ხაზზე გაუშვეს, მიუხედავად მიღებული დაპირებისა, რომ რუსულ არმიაში მას საბრძოლო როლი არ ექნებოდა.

46 წლის სამი შვილის მამა წელს შეუერთდა ტიმ კირბის "ამერიკული სოფლის" პროექტს. კირბი ამერიკელი ტელეპიროვნებაა, რომელიც 2006 წლიდან რუსეთში ცხოვრობს და პუტინის პროპაგანდას აშშ-ში ავრცელებს. ჰაფმანები თავიანთ მოგზაურობას სოციალურ მედიაში ასახავდნენ და რუსულ პროპაგანდისტულ ვიდეოებში ჩანდნენ, პარალელურად კი ახალი ცხოვრებისთვის საჭირო თანხას აგროვებდნენ.

მაისში დერეკი, სამხედრო გამოცდილების გარეშე, რუსულ არმიაში ჩაეწერა, იმ იმედით, რომ შემდუღებლად იმუშავებდა. მისი ცოლი, დეანა, განმარტავს: "დერეკს უთხრეს, რომ ორ კვირაში წინა ხაზზე პირდაპირ წაიყვანდნენ, მაგრამ როგორც ჩანს, წვრთნებისთვის კიდევ 1 კვირის განმავლობაში დაიტოვეს და ფრონტზე გაგზავნას მაინც უპირებენ."

დერეკის მთავარი მოტივაცია იყო ოჯახისთვის მოქალაქეობის დაჩქარებული მიღება და ემიგრაციის ტრადიციულად ხანგრძლივი პროცესისთვის გვერდის ავლა. ასევე, ელოდა, რომ არმიაში გაწევრიანებისთვის ბონუსს მიიღებდა, ქვეყანაში კი პატივისცემას დაიმსახურებდა.

"არ მინდა, აქ, რუსეთში ვინმემ თქვას, რომ აქ ჩვენი ადგილი არ არის, ამიტომ თუ ჩემს სხეულს რუსეთისთვის დავაყენებ საფრთხეში, თუ ქვეყანას — ჩვენს ახალ ქვეყანას — დავიცავ, ჩვენ აქ ჩვენს ადგილს მოვიპოვებთ," — განაცხადა დერეკმა გასულ თვეს ჩაწერილ ვიდეოში.

რუსი სამხედროები დერეკს კონკრეტულ დაპირებებს აძლევდნენ: ჯერ ამბობდნენ, რომ ომის ჟურნალისტად იმუშავებდა. შემდეგ — სარემონტო ბატალიონში, როგორც მექანიკოსი, მისი შედუღების უნარების გამოყენებით. საბრძოლო როლის შეთავსება არცერთ სცენარში ფიგურირებდა.

რეალურად კი დერეკი ერთ-ერთ უცხოელთა განყოფილებაში აღმოჩნდა, რომელსაც უკრაინის ფრონტისკენ გაგზავნამდე დაჩქარებული წვრთნა და რუსული ენის კურსები უტარდება.

დეანამ სოციალური მედიის პოსტში აღწერა სიტუაცია და თქვა, რომ დერეკი "თავს ისე გრძნობს, თითქოს ახლა მტაცებლებს მიუგდეს და მხოლოდ თავის რწმენაზე უწევს დაყრდნობა."

ამ გაწვევამ დერეკის ოჯახისთვის ფინანსური სირთულეებიც შექმნა. დერეკისა და მისი თანამებრძოლებისგან მოითხოვეს 10,000 რუბლის შეწირულობა მათივე აღჭურვილობისთვის, რაც დერეკის ხელფასის დიდ ნაწილს შეადგენს. დეანას თქმით, დერეკის მიერ არმიაში მსახურების ერთი თვის შემდეგაც კი მის ოჯახს არც კუთვნილი ხელფასი და არც არმიაში გაწევრიანების ბონუსი არ მიუღია.