ამერიკის შეერთებული შტატების პრეზიდენტმა, დონალდ ტრამპმა გაავრცელა მოკლე ვიდეორგოლი, სადაც აზერბაიჯანის პრეზიდენტი ილჰამ ალიევი მას აქებს, რაც ფართოდ გაშუქდა აზერბაიჯანული პროსამთავრობო მედიის მიერ.

ალიევმა ეს განცხადებები 19 ივლისს, შუშაში (შუში) მედიაფორუმზე გამოსვლის დროს გააკეთა. ტრამპმა კი ვიდეო სამშაბათს, 22 ივლისს სოციალურ მედია პლატფორმა Truth Social-ზე გააზიარა.

თავის გამოსვლაში ალიევმა განმარტა, რომ მას არასდროს უწინასწარმეტყველებია ტრამპის გამარჯვება, თუმცა ნათლად განაცხადა, რომ აზერბაიჯანი ტრამპის პრეზიდენტობას ამჯობინებდა, რადგან "ბატონი ტრამპი, ისევე როგორც აზერბაიჯანის ხალხი, იზიარებს ფუნდამენტურ ღირებულებებს, მათ შორის ოჯახურ ღირებულებებს".

ალიევმა განაგრძო მტკიცება, რომ ტრამპის მიზანი ომების დასრულება იყო.

"ჩვენ პირადად მადლიერები ვართ მისი პირადი მისწრაფებისთვის, დაეხმაროს სომხეთსა და აზერბაიჯანს საბოლოო შეთანხმების მიღწევაში, მიუხედავად იმისა, რომ ის უფრო მეტად სხვა გლობალური უსაფრთხოების საკითხებით არის დაკავებული," — განაცხადა ალიევმა.

ვიდეოში ალიევი საუბრის დასასრულს ტრამპს მისი დღის წესრიგის განხორციელებაში წარმატებებს უსურვებს, "განსაკუთრებით სისტემის გასუფთავებაში".

სამშაბათს, 22 ივლისს ალიევმა მადლობა გადაუხადა ტრამპს ვიდეოს გაზიარებისთვის და კიდევ ერთხელ გაუსვა ხაზი აზერბაიჯანის მხარდაჭერას ტრამპის "ხედვისა და ძალისხმევის მიმართ, რომელიც მიმართულია მშვიდობისა და სტაბილურობის ხელშეწყობისკენ მთელ მსოფლიოში, მათ შორის ჩვენს რეგიონში".

მანამდე, 19 ივლისს, ტრამპმა რესპუბლიკელ სენატორებს განუცხადა, რომ აშშ-ს "მაგიამ იმოქმედა" სომხეთსა და აზერბაიჯანს შორის სამშვიდობო მოლაპარაკებებში და თქვა, რომ შეთანხმება "საკმაოდ ახლოსაა". ეს განცხადება მას შემდეგ გაკეთდა, რაც აზერბაიჯანისა და სომხეთის ოფიციალური პირები რეგიონული სატრანსპორტო კავშირების განბლოკვაზე არ თანხმდებოდნენ.

წლის დასაწყისში, ტრამპის ადმინისტრაციის მაღალჩინოსნებმა აზერბაიჯანთან დიპლომატიური მოლაპარაკებების დაიწყეს, რომლის ფარგლებშიც მარტში, სპეციალური წარმომადგენელი სტივ უიტკოფი ბაქოში ჩავიდა. ასევე, სატელეფონო საუბარი შედგა აშშ-ის ეროვნული უსაფრთხოების საკითხებში მაშინდელ მრჩეველ მაიკ უოლცსა და მის აზერბაიჯანელ კოლეგას ჰიქმათ ჰაჯიევს შორის.

მოლაპარაკებები, როგორც ჩანს, ძირითადად ეხებოდა სომხეთსა და აზერბაიჯანს შორის მიღწეულ შეთანხმებას ისტორიული სამშვიდობო ხელშეკრულების ხელმოწერას. მაიკ უოლცმა ხაზი გაუსვა, რომ შეერთებული შტატები მიესალმება ამ პროგრესს და მიიჩნევს, რომ "ორივე ქვეყანამ დიდი ნაბიჯი გადადგა წინ".

OC Media: ეს სტატია სომხურ ენაზე თარგმნა და ხელახლა გამოაქვეყნა ჩვენმა პარტნიორმა CivilNet-მა

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.