რამდენიმე დღის წინ, ელექტრონული პეტიციების ვებსაიტზე manifest.ge-ზე, განცხადება გამოქვეყნდა, რომელზე ხელისმომწერებიც სახელმწიფოსგან ონკოპაციენტი ბავშვების შესაბამისი სერვისებით სრულად უზრუნველყოფას ითხოვენ. აღნიშნული ეხება მკურნალობასა და რეაბილიტაციას საქართველოში და მის ფარგლებს გარეთ, როცა ეს უკანასკნელი აუცილებელი ხდება. ასევე საკონტროლო კვლევებს მკურნალობისა და რეაბილიტაციის პერიოდში.

პეტიციას, რომელიც ააიპ ბავშვთა სიმსივნეები და სუპერგმირების დამფუძნებელმა, მარიამი მითაიშვილმა შექმნა, ამ დროისათვის 5 000-ზე მეტი ხელმოწერა აქვს. მის ტექსტში აღნიშნულია ის სირთულეები, რომლებსაც ონკოლოგიური დაავადების მქონე ბავშვები და მათი ოჯახები ქვეყანაში მკურნალობისას აწყდებიან. მათ შორისაა აუცილებელი პროცედურების ჩატარების შეუძლებლობა და ხელმიუწვდომლობა სერვისებზე.

"საქართველოში შეზღუდულია ბავშვთა ონკოლოგებისა და კლინიკების რაოდენობა. არ ტარდება სასიცოცხლოდ მნიშვნელოვანი პროცედურები ბავშვებში, მაგალითად როგორიცაა ძვლის ტვინის გადანერგვა და სხვა მაღალტექნოლოგიური ოპერაციები. შესაბამისად, ბავშვის გადასარჩენად მშობელს უწევს შვილის საზღვარგარეთ გამგზავრება სამედიცინო მომსახურების მიღების მისაღებად, რაც საშუალოდ $150 000 ჯდება. სახელმწიფო, იმ ბავშვს რომელსაც საზღვარგარეთ უწევს მკურნალობის მიღება მხოლოდ 30 000 ლარით ეხმარება, რაც ნიშნავს იმა, რომ სახელმწიფო არ ეხმარება ბავშვს და ოჯახები მხოლოდ კერძო პირების კეთილი შემოწირულობების იმედად არიან დარჩენილები. ბევრი ბავშვის სიცოცხლე შეეწირა სწორედ ფინანსების არქონას. ონკოლოგიური დაავადებების მქონე ბავშვები წლების განმავლობაში საკონტროლო კვლევებს საჭიროებენ, რაც ასევე არ ფინანსდება სახელმწიფოს მხრიდან".

პეტიციის ტექსტში ასევე აღწერილია ზოგადი სურათი, რომელიც ამჟამად არსებობს ქვეყანაში. მის მიხედვით, საქართველოში ყოველწლიურად, დაახლოებით, 100 ბავშვს უდასტურდება ავთვისებიანი სიმსივნე. ონკოპაციენტი ბავშვების რაოდენობამ ბოლო ხუთ წელიწადში 683 შეადგინა, თითოეული მათგანის მკურნალობის დაფინანსება კი სახელმწიფოს მხრიდან 23 ათას ლარს შეადგენს, რაც, ტექსტის მიხედვით, "იმდენად მიზერულია, რომ ხშირად კვების და ხარისხიანი მედიკამენტების შეძენის საშუალებასაც არ იძლევა ოჯახებისთვის".

"ონკოლოგიური დაავადებების მქონე ბავშვების მშობლები გავერთიანდით რათა ერთად მოვითხოვოთ ბავშვების სიცოცხლის უფლების დაცვა დღეს", — ვკითხულობთ პეტიციაში.

როგორც დასასრულსაა ნახსენები, პროექტს ააიპ ბავშვთა სიმსივნეები და სუპერგმირები ახორციელებს, მისი მხარდამჭერები კი USAID და EWMI Access არიან.

აღსანიშნავია, რომ სექტემბერი ბავშვთა სიმსივნეების შესახებ ცნობიერების ამაღლების საერთაშორისო თვეა.