პარლამენტის თავმჯდომარის მოადგილე, არჩილ თალაკვაძე ამტკიცებს, რომ გავრცელებულ ფაილებზე არაფერი იცის იმაზე მეტი, რაც მედიაში გავრცელდა. ის ამბობს, როგორც პარლამენტარი, ვერ გააკეთებს კომენტარს გამოძების გასრულებამდე.

"მე არ მაქვს ამაზე მეტი ინფორმაცია, რაც მედიით გავრცელდა, შესაბამისად, ვერანაირ დამატებით კომენტარს ვერ გავაკეთებ [...] გამოძიება დაიწყო ამ საკითხზე, თქვენ იცით, შესაბამისად, პასუხებს გასცემს გამოძიება და არა რომელიმე პარლამენტარი. იმიტომ, რომ პარლამენტარს არ შეუძლია ამ საკითხის გამოძიება", — განაცხადა არჩილ თალაკვაძემ TV პირველის ეთერში.

თალაკვაძემ მისი მისამართით დასმულ კითხვებისთვის თავის ასარიდებლად ჟურნალისტს განუცხადა, რომ საკითხზე გამოძიება დაწყებულია და პასუხები შესაბამისი უწყებებისგან უნდა მივიღოთ, თუმცა შემდეგ დოკუმენტებში მოცემულ ინფორმაციას დეზინფორმაცია უწოდა.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს. ჩანაწერების მიხედვით, უსმენენ და უთვალთვალებენ სასულიერო პირებს, ელჩებსა და საელჩოების თანამშრომლებს, არასამთავრობო ორგანიზაციების წევრებს, აქტივისტებს, პოლიტიკოსებს, ჟურნალისტებს, ძალადობრივი ჯგუფის წევრებსა და ლიდერებს და ამ ადამიანებთან კავშირში მყოფ მოქალაქეებს. ამასთან, ჩამონათვალში შეხვდებით კონკრეტული სასულიერო პირების მძღოლებს, საპატრიარქოს დაცვას, სტიქაროსნებს, თეოლოგებსა და სამების დამლაგებელსაც კი. ფაილებს შორის არის ინფორმაცია საპატრიარქოში რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც ავთენტურობას არც უარყოფს და არც ადასტურებს. უწყება აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. 14 სექტემბერს საქმეზე გამოძიება პროკურატურამ კერძო კომუნიკაციის საიდუმლოების დარღვევის მუხლით დაიწყ, 18 სექტემბერს კი დამატებით განცხადება გაავრცელა, სადაც მიუთითა, რომ გამოძიება ფარული მასალების შემდგენსა და მომპოვებლებსაც ეძებს. მათივე განცხადებით, სამართლებრივი დახმარების ფარგლებში, აშშ-სა და სხვა ქვეყნებს გამოძიებით დადგენილ სერვერებზე მონაცემების შენახვისა და გამოთხოვის მიზნით მიმართეს.

გაიგეთ მეტი: