გასულ კვირას, პროფესორმა რობერტ კელიმ, რომელსაც აქამდე საზოგადოება ექსპერტად იცნობდა, მაყურებელს თავი სულ სხვა ამბით დაამახსოვრა. BBC-ის პირდაპირ ეთერში ვებკამერით ჩართვის დროს ოთახში მისი მცირეწლოვანი შვილი ცეკვა-ცეკვით შემოვიდა. რამდენიმე წამის შემდეგ მას მეორე ბავშვიც შემოჰყვა. ბოლოს კი ოთახში ქალი შემოვარდა, რომელმაც ბავშვებს ხელი ჩაჰკიდა და ოთახიდან გაიყვანა.

ვიდეომ ინტერნეტში დიდი ინტერესი გამოიწვია და ამ ამბავს გაგრძელებაც მოჰყვა. რობერტ კელი ოჯახთან ერთად BBC-ის ეთერში დაბრუნდა და ვრცლად ისაუბრა.

"რამდენჯერმე ვუყურეთ ამ ვიდეოს და ყველა, ვისაც კი ვიცნობთ, ამბობს, რომ სიტუაცია ძალიან სასაცილოა. გვესმის, რატომ უყურებენ ადამიანები ამას სიამოვნებით. ისინი ხედავენ ჩვეულებრივ ოჯახს უჩვეულო სიტუაციაში, რაც ნამდვილად სახალისოა, თუმცა ჩვენ იმაზე უფრო მეტად ვნერვიულობდით, რომ გვეგონა, BBC აღარასდროს დაგვირეკავდა და ურთიერთობა გაგვიფუჭდებოდა", ამბობს რობერტ კელი.

როგორც პროფესორის მეუღლე ჯუნ კიმი ამბობს, მასაც გაეცინა ვიდეოს ნახვისას, თუმცა ბევრი ინერვიულა.

"ძალიან ვინერვიულე. მთავარია, ადამიანებმა იმხიარულონ ამ ამბებზე. კამათობდნენ, ძიძა ვიყავი თუ ცოლი. სიმართლე ისაა, რომ მე მისი მეუღლე ვარ და არა ბავშვების ძიძა. ასე რომ, ძალიან გთხოვთ, ამაზე აღარ იკამათოთ“, ხუმრობით აღნიშნა ჯუნ კიმმა.

სულ ახლახან, ერთ-ერთმა კომედიურმა შოუმ იუმორისტული სკეტჩი გადაიღო, სადაც ნაჩვენებია, თუ როგორ მოიქცეოდა დედა, თუ BBC-სთან ინტერვიუს შვილები შეაწყვეტინებდნენ.

პატარა ვიდეოში დედის როლს მსახიობი ქეით ვორდსვორტი ასრულებს, რომელიც ორიგინალის მსგავსად, სამხრეთ კორეის შესახებ პასუხობს კითხვებს. სწორედ ამ დროს შემოდიან მის ოთახში ბავშვები, რომელსაც დედა ჯერ რძეს ასმევს, შემდეგ ათამაშებს, წვავს ქათამს, აუთოვებს პერანგს, ასუფთავებს ტუალეტს და ბომბსაც კი გააუვნებელყოფს.