ბაღდათისა და ქუთაისის მერიამ თანამშრომლებისთვის ბიუჯეტის ფულით ჯამში 2 038 ლარის ღირებულების მობილური ტელეფონები უყიდა. ინფორმაცია ამის შესახებ თავდაპირველად გამომძიებელ ჟურნალისტთა გაერთიანება აი ფაქტმა გაავრცელა.

ბაღდათის მერიაში On.ge-ს უთხრეს, რომ სამსუნგის ფირმის 784 ლარის ღირებულების ერთი ტელეფონი სახაზინო და აღრიცხვის განყოფილების ხელმძღვანელისთვის შეიძინეს, რომელსაც, როგორც მერია ირწმუნება, კომპიუტერი არ ჰქონდა და მობილური უკეთესი კომუნუკაციის მისაღწევად შეუძინეს.

"ვინაიდან დისტანციურად ვართ და ძალიან ინტენსიური სამუშაო პროცესი გვაქვს, ის კი სოფელში ცხოვრობს და არ ჰქონდა ინტერნეტი და თავისი კომპიუტერი, ამიტომ შევუძინეთ. კომუნუკაცია რომ გვქონდეს უკეთესი, ზუმში ჩართვა რომ შეძლებოდა და მუშა პროცესი ყოფილიყო", — ამბობს ბაღდათის მერიის საფინანსო-საბიუჯეტოს სამსახურის ხელმძღვანელი ლერი გუმბერიძე.

მისივე მტკიცებით, ბიუჯეტის ფულით შეძენილი ტელეფონი სახელმწიფო საკუთრებაა.

ქუთაისის მერიაში კი განგვიცხადეს, რომ ზედამხედველობის სამსახურმა, მიმდინარე წლის ივლისში, შპს უნიკომთან გაფორმებული ხელშეკრულებით, 3 მობილური ტელეფონი შეიძინა, რომელშიც სპეციალური პროგრამაა ჩატვირთული.

''ადმინისტრაციული სამართალდარღვევის კოდექსში განხორციელებულმა ცვლილებებმა დგომა-გაჩერების წესების დარღვევისათვის ახალი ბაზის და სპეციალური პროგრამის
შექმნა განაპირობა, რომელიც ამ ტელეფონებში ჩაიტვირთა. სამართალდარღვევის ფაქტზე შესაძლებელი იქნება მობილური ტელეფონით სპეციალურ ბაზასთან წვდომა, ავტომობილის მესაკუთრის იდენტიფიცირება და ასევე, სამართალდამრღვევთან SMS-ის გაგზავნა ავტომატურად, რაც გაამარტივებს აღნიშნული სამართალდარღვევის საქმისწარმოებას და რაც მთავარია, მოახდენს დამრღვევის სრულად ინფორმირებას'', — აცხადებს მერია.

ქუთაისის მერიის მტკიცებით, აღნიშნული პროგრამის უხარვეზოდ მუშაობისთვის გარკვეული პარამეტრების მქონე მობილური ტელეფონები იყო საჭირო და ჯამში 1 254 ლარის ოდენობის სამი მობილური ტელეფონი სწორედ ამ ფაქტორის გათვალისწინებით შეიძინეს.