ამერიკის შეერთებული შტატების პრეზიდენტმა, ჯო ბაიდენმა არავაქცინირებულ მოსახლეობას მიმართა და მოუწოდა, რომ გააკეთონ ის, რაც სწორია. ბაიდენის განცხადებით, მათ მიერ აცრაზე უარის თქმის ფასი მთელმა ქვეყანამ გადაიხადა.

"ჩემი სათქმელი არავაქცინირებული ამერიკელებისთვის ესაა — კიდევ რას ელოდებით? კიდევ რის დანახვა გჭირდებათ? ვაქცინა უფასო, უსაფრთხო და აუცილებელია. მას FDI-ის ავტორიზაცია აქვს მინიჭებული. ვაქცინის 1 დოზა მაინც 200 მილიონზე მეტ ამერიკელს აქვს გაკეთებული.

დიდხანს ვითმენდით, მაგრამ ჩვენი მოთმინებაც იწურება. თქვენი უარი ყველა ჩვენგანს ძვირად დაგვიჯდა, ამიტომ, გთხოვთ, გააკეთეთ ის, რაც სწორია. მხოლოდ მე ნუ დამიჯერებთ, იმ არავაქცინირებულ ამერიკელებს მოუსმინეთ, რომლებიც ახლა საავადმყოფოს საწოლებზე წვანან, ბოლო ამოსუნთქვაღა აქვთ დარჩენილი და ამბობენ — "ნეტავ, ავცრილიყავი, ნეტავ". ეს ტრაგედიაა. გთხოვთ, ამას თქვენს ტრაგედიად ნუ აქცევთ", — განაცხადა ბაიდენმა.

ამ დროის მონაცემებით, მსოფლიოში კორონავირუსით სულ 219 მლნ ადამიანი დაინფიცირდა, აქედან 4,5 მლნ კი გარდაიცვალა. აშშ-ში კოვიდი 40 მლნ-ზე მეტ ადამიანს დაუდასტურდა, 656 000-ზე მეტი კი პანდემიას ემსხვერპლა.

დღეისთვის მსოფლიოში კოვიდის საწინააღმდეგო ვაქცინით ორჯერადად აცრილია 2,3 მილიარდზე მეტი ადამიანი. დღევანდელი მონაცემებით, აშშ-ში 1 დოზით მაინც 200 მლნ-ზე მეტი ადამიანია აცრილი. ორივე დოზა კი გაკეთებული აქვს 177 მლნ ადამიანს.