ყვარელში, საქართველოს ბანკში შეჭრაში ბრალდებული დააკავეს. ინფორმაციას ამის შესახებ შსს-ში ადასტურებენ.

"რამდენიმესაათიანი სპეცოპერაცია წარმატებით დასრულდა, შინაგან საქმეთა სამინისტრო თანამშრომლებმა გაანეიტრალეს და დააკავეს პირი, რომელსაც მძევლები ჰყავდა აყვანილი. ყველა მძევალი თავისუფალია, მათ სიცოცხლესა და ჯანმრთელობას საფრთხე არ ემუქრება", — განაცხადა ქეთი კოვზიაშვილმა.

მან სხვა დეტალებზე არ ისაუბრა, მათ შორის, არც იმაზე, იდენტიფიცირებულია თუ არა თავდამსხმელი. შსს-ს წარმომადგენლის თქმით, გამოძიება სამი მუხლითაა დაწყებული და დეტალური ინფორმაციას უწყება მოგვიანებით გაავრცელებს.

განახლება:

შსს-მ მოგვიანებით განმარტა, რომ ყვარელში ტერორისტული მიზნით მძევლად ხელში ჩაგდებისა და საბრძოლო მასალის მართლსაწინააღმდეგო შეძენა-შენახვა-ტარების ბრალდებით, ერთი პირი 49 წლის შ.მ. დააკავეს.

"გამოძიებით დადგინდა, რომ შეიარაღებული შ.მ. ყვარელში, ჭავჭავაძის ქუჩაზე მდებარე “საქართველოს ბანკის" ფილიალში დღის მეორე ნახევარში შეიჭრა და დიდი ოდენობის თანხის დაუფლების მიზნით 13 პირი მძევლად აიყვანა. ადგილზე დაუყოვნებლივ მოხდა პოლიციის შესაბამისი დანაყოფების მობილიზება და დაიწყო ოპერატიულ-საგამოძიებო ღონისძიებები. შსს წარმომადგენლებსა და თავდამსხმელს შორის განხორციელებული მოლაპარაკებების შედეგად, შ.მ.-მ მძევლად აყვანილი ყველა ადამიანი ეტაპობრივად გაათავისუფლა, რის შემდეგაც სამართალდამცველებმა ის ბრალდებულის სახით ადგილზე დააკავეს", — ნათქვამია უწყების განცხადებაში.

მათივე ცნობით, მომხდარზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს.

შინაგან საქმეთა სამინისტრომ ყვარელში, ბანკში შეიარაღებული პირის შესახებ ინფორმაცია დღეს, 9 სექტემბერს, დაახლოებით 15:00 საათზე გაავრცელა. დაახლოებით ორ საათში, უწყების წარმომადგენელმა თქვა, რომ ყველა მძევალი თავისუფალია.