ბოლო სამ წელიწადში პირველად აშშ-ში რეფინანსირების განაკვეთი გაიზარდა. კერძოდ, აშშ-ის ფედერალურმა რეზერვმა (Fed) მიიღო გადაწყვეტილება განაკვეთი 25 საბაზისო პუნქტით გაეზარდა, რის შედეგად ის 3.75-4.0%-ის დიაპაზონით განისაზღვრა. მანამდე კი განაკვეთი 3.5–3.75% დიაპაზონში იყო.

გადაწყვეტილებას მკაცრად ეწინააღმდეგებოდა პრეზიდენტი დონალდ ტრამპი, რომელიც განაკვეთის შემცირებას მოითხოვდა. თუმცა, Fed-ის თავმჯდომარის, კევინ უორშის განცხადებით, გაზრდის გადაწყვეტილების მიზეზი ის იყო, რომ "ინფლაცია ზედმეტად მაღალია და უკვე დიდი ხანია, ასეა". შესაბამისად, მისი თქმით, ეს იყო "გაწონასწორებული" და "პასუხისმგებლიანი გადაწყვეტილება".

განცხადების შემდეგ ტრამპმა უორშს მხარდაჭერა გამოუცხადა, თუმცა განაცხადა, რომ Fed-ის საბჭო, რომელიც საპროცენტო განაკვეთების შესახებ გადაწყვეტილებებს იღებს, "მტრულად არის განწყობილი".

მაღალი საპროცენტო განაკვეთები სესხებს, იპოთეკურ კრედიტებსა და საკრედიტო ბარათებს აძვირებს, თუმცა დანაზოგებზე უფრო მაღალი სარგებლის მიღების შესაძლებლობას ქმნის.

ცნობისთვის, უორშმა ოთხშაბათს გამართულ პრესკონფერენციაზე განაცხადა, რომ Fed-ის ხელმძღვანელობაში "ოპტიმისტური განწყობაა", თუმცა ინფლაცია კვლავ პრობლემად რჩება.

სხვა მრავალი ცენტრალური ბანკის მსგავსად, Fed-ის მიზანიც ინფლაციის 2%-ზე ან უფრო დაბალ ნიშნულზე შენარჩუნებაა. უორშის თქმით, აშშ-ში ინფლაცია ამ სამიზნე მაჩვენებელს "ხუთ წელზე მეტია" აღემატება.

ცენტრალური ბანკები, როგორც წესი, ინფლაციის მაღალი მაჩვენებლის დროს საპროცენტო განაკვეთებს ზრდიან, რათა შეამცირონ ხარჯვა და წაახალისონ დანაზოგების გაკეთება. მათი მიზანია, ამ გზით ფასების ზრდის ტემპი შეანელონ. თუმცა, ეს ბალანსის დაცვას მოითხოვს, რადგან მაღალი საპროცენტო განაკვეთები შესაძლოა კომპანიებს ინვესტიციების გადადებისკენ უბიძგებდეს და ეკონომიკურ ზრდასაც შეუშალოს ხელი.