საგარეო საქმეთა მინისტრის, დავით ზალკალიანის განცხადებით, საქართველოსა და ევროკავშირს შორის "არის განსხვავებული აღქმები" იმასთან დაკავშირებით, რამდენად შეასრულა მთავრობამ მოთხოვნები 75 მილიონიანი ტრანშის მისაღებად.

ზალკალიანმა ჟურნალისტებს მოუწოდა, "კარგად ისწავლონ კითხვა იმ განცხადებისა, რასაც ჩვენი პარტნიორები აკეთებენ". მან კამერების წინ წაიკითხა ევროკავშირის წარმომადგენლის, ჟულიენ კრამპის განცხადების ის ნაწილი, სადაც საუბარია იმაზე, რომ "საქართველომ ვერ შეძლო საკმარისად შეესრულებინა მაკროფინანსური დახმარების მიღების პირობა" და განაცხადა, რომ ამ ფრაზაში საკვანძო სიტყვაა "საკმარისად". ზალკალიანის ამტკიცებს, რომ საქართველომ მოთხოვნების ნაწილი შეასრულა.

"ევროკავშირი აღნიშნავს, რომ რაღაცა ნაწილში ის იღებს იმ რეფორმებს, რომელიც მართლმსაჯულების მიმართულებით საქართველოს ხელისუფლებამ განახორციელა, რაღაც ნაწილში, ის ამბობს, რომ ეს არის არასაკმარისი. გვესმის, რომ ეს პირობითობა იყო ჩადებული, არავინ უარყოფს ამას.

ჩვენ ვამბობთ და ჩვენი პოზიცია არის დაფუძნებული იმ სამართლებრივ შეფასებებზე, რომელსაც აკეთებენ იურისტები და ასევე, ვენეციის კომისიიდან მიღებული რეკომენდაციები, რომ ვენეციის კომისიის რეკომენდაციები მნიშვნელოვანწილად არის შესრულებული. აქ არის განსხვავებული აღქმები ჩვენსა და ევროკავშირს შორის. ეს იწვევს აქ პოზიციების შეუსაბამობას", — განაცხადა დავით ზალკალიანმა.

გუშინ, 31 აგვისტოს, პრემიერმინისტრმა ირაკლი ღარიბაშვილმა განაცხადა, რომ საქართველო თავს შეიკავებს ევროკავშირისგან მაკროფინანსური დახმარების მეორე ნაწილის აღებაზე. ღარიბაშვილმა ეს გადაწყვეტილება საგარეო ვალის შემცირების სურვილით ახსნა. მანამდე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროფინანსურ დახმარებას "ფინანსური დატვირთვა აღარ აქვს".

საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

აღსანიშნავია, რომ 24 აგვისტოს, ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროფინანსური დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".

გაიგე მეტი:

• პუტინთან კეკლუცობა და ცეკვაა, საქართველო ბრუნდება რუსულ ორბიტაზე — დეკანოიძე დახმარების არმიღებაზე
• ევროპარლამენტარი არ არი ჩემი უფროსი — ღარიბაშვილი
• ძალიან მაცდური კარიერული პერსპექტივაა — კრამონი ღარიბაშვილის განცხადებაზე