ჯანდაცვის მინისტრის, ეკატერინე ტიკარაძის განცხადებით, არსებობენ პაციენტები, რომლებიც საჭიროების შემთხვევაში სასწრაფო დახმარების სამსახურს არ მიმართავენ, მაგრამ პოსტს წერენ Facebook-ზე. მას ჟურნალისტებმა ბოლო პერიოდში ორსულების გარდაცვალების შემთხვევების მატებაზე ჰკითხეს, რაზეც მინისტრმა უპასუხა, რომ კონკრეტულ პაციენტებზე საუბარს ერიდება, რადგან ეს არის არამხოლოდ ოჯახის, არამედ ქვეყნის ტრაგედია.

"რა თქმა უნდა, ჩვენ ამ გართულებებს ვაკვირდებით სამედიცინო და ასევე, სტატისტიკურ ჭრილში. ჩართული არის გინეკოლოგთა ასოციაცია, რათა მათ დადონ კონკრეტული დასკვნები, რა არის გარკვეული მიზეზი იმის, თუ რატომ გვაქვს ბოლო პერიოდში გახშირებული ლეტალური შემთხვევები ორსულების კომპონენტში. თუმცა, აქვე აუცილებლად უნდა დავძინოთ, რომ არის რიგ შემეთხვევაში დაგვიანებული სტაციონარიზაცია. გუშინ, მაგალითად, ორსულის სამეგრელოს რეგიონიდან საავადმყოფოში გადმოყვანა იქნა საჭირო, თუმცა, ამ ორსულს დარეკილი არ ჰქონდა 112-ზე, მაგრამ, სამაგიეროდ, პოსტი ედო Facebook-ზე. კარგი არის, რომ ჩვენი საზოგადოებასთან ურთიერთობის სამსახური აკვირდება ყველა იმ ჯგუფს, რომელიც აქტიურია ფეისბუქზე, ჩვენ ვიღებთ აქედან დამატებით ინფორმაციებს და იმ პაციენტებისთვის, რომლებიც სამწუხაროდ, არ მიმართავენ არც ექიმს და არც 112-ს, მაგრამ არჩევენ სოციალური მედიით კომუნიკაციას, აქტიურად ვცდილობთ, რომ სამინისტრო და სასწრაფო გადაუდებელი დახმარება იყოს ყურადღებით და გაუწიოს დახმარება", — აღნიშნა მან.

აღსანიშნავია, რომ პანდემიის დასაწყისიდან დღემდე, მოქალაქეები ხშირად წერენ ჯანდაცვის სამინისტროს ცხელი ხაზების გადატვირთულობაზე, რის გამოც, დახმარებას სწორედ სოციალურ ქსელში ითხოვენ.

26 ივლისს, გვიან ღამით თბილისში კორონავირუსით გარდაიცვალა 19 წლის ქალი, რომელმაც ერთი თვის წინ იმშობიარა. როგორც On.ge-ს ბოკერიას სახელობის კლინიკაში უთხრეს, რესპირატორული პრობლემებით 2 აგვისტოს რეანიმაციაში გადაიყვანეს, თუმცა მისი გადარჩენა ვერ მოხერხდა.

27 აგვისტოს მონაცემებით, საქართველოში კორონავირუსის 4 031 ახალი შემთხვევა დაფიქსირდა, გამოჯანმრთელდა 4 585, ხოლო გარდაიცვალა — 73 ადამიანი.

ქვეყანაში Covid-19-ის პანდემიის გავრცეებიდან დღემდე დადასტურებული შემთხვევების საერთო რაოდენობა შეადგენს 536 202-ს, მათგან გამოჯანმრთელდა 473 502, ხოლო ვირუსს ჯამში ემსხვერპლა 7 101 ადამიანი.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები