საერთაშორისო სავალუტო ფონდის და ბაიდენის ადმინისტრაციის გადაწყვეტილების შემდეგ, შეაჩეროს ავღანეთში პროექტები, ქვეყნის დაფინანების შეწყვეტის გადაწყვეტიელბა მსოფლიო ბანკმაც მიიღო. ეს გადაწყვეტილება მთავარმა საერთაშორისო ფინანსურმა ორგანიზაციამ იმის გამო მიიღო, რომ შეშფოთებულნი არიან თალიბანის ხელში "ქვეყნის განვითარების პერსპექტივით, განსაკუთრებით ქალებისთვის". ამის შესახებ ინფორმაციას BBC ავრცელებს.

მათივე ინფორმაციით, მსოფლიო ბანკს 2002 წლიდან ავღანეთში რეკონსტრუქციისა და განვითარების პროექტებისთვის 5,3 მილიარდ დოლარზე მეტი (3.9 მილიარდი ფუნტი სტერლინგი) აქვს გამოყოფილი.

"ჩვენ ყურადღებით ვაკვირდებით და ვაფასებთ სიტუაციას ჩვენი შიდა პოლიტიკისა და პროცედურების შესაბამისად. ჩვენ გავაგრძელებთ მჭიდრო კონსულტაციებს საერთაშორისო თანამეგობრობასთან და პარტნიორებთან. ჩვენ ერთად ვეძებთ გზებს, რომლითაც შევძლებთ, ვიყოთ ჩართული, რათა შევინარჩუნოთ ძნელად მიღწეული განვითარება და გავაგრძელოთ ავღანეთის ხალხის მხარდაჭერა", — აცხადებს მსოფლიო ბანკის წარმომადგენელი BBC-ისთან ინტერვიუში.

მსოფლიო ბანკმა ეს გადაწყვეტილება მას შემდეგ რამდენიმე დღეში მიიღო, რაც საერთაშორისო სავალუტო ფონდმა ავღანეთში ტრანშები შეაჩერა. მანამდე კი ბაიდენის ადმინისტრაციამ ავღანეთის ცენტრალური ბანკის რეზერვები გაყინა, რომელიც აშშ-ში ინახება.

თალიბანის გადაწყვეტილებით კი, ქვეყნიდან ამერიკული დოლარისა და ანტიკვარული ნივთების გატანა მკაცრად აიკრძალა.

ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს. მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ. ბოლო დღეებში ავღანეთში გარდაცვლილთა რაოდენობის შესახებ ზუსტი მონაცემები არ არსებობს და მედიაში სხვადასხვა მონაცემი ვრცელდება. ავღანეთის ხელისუფლების ნაწილი, რომელსაც სათავეში ვიცე-პრეზიდენტი ამრულაჰ სალეჰი უდგას, დანებებას არ აპირებს. ის სამხედრო მეთაურ აჰმად მასუდთან ერთად მომხრეებს პანჯშირის ხეობაში კრებს. ცოტა ხნის წინ ცნობილი გახდა, რომ თალიბანის ხელმძღვანელობამ ასობით მებრძოლი პანჯშირის ხეობის ასაღებად გაგზავნა. თუმცა, შედეგების შესახებ ჯერეჯრობით არაფერია ცნობილი.