ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, მიხეილ სარჯველაძე საქართველოსა და ბელარუსის უსაფრთხოების სამსახურებს შორის დადებული ხელშეკრულების საწინააღმდეგოდ გამოთქმულ მოსაზრებებს სპეკულაციად აფასებს.

"უაზროდ და თან სპეკულაციურად ატეხილი აჟიოტაჟი გვაქვს სახეზე, როდესაც მხოლოდ იმიტომ, რომ ასე ვთქვათ, ბელორუსიის მიმართ არსებობს რაღაცა სანქციები, აქედან გამომდინარე მასთან თანამშრომლობის ნებისმიერი ფორმა გამოყენებული იქნეს, დემაგოგიურად, სპეკულაციურად, საქართველოს სახელმწიფო დაწესებულებების, ამ შემთხვევაში, სახელმწიფო უსაფრთხოების სამსახურის საწინააღმდეგოდ", — განაცხადა მიხეილ სარჯველაძემ.

13 აგვისტოს ბელარუსის ოფიციალურ საკანონმდებლო ვებსაიტზე დოკუმენტი გამოქვეყნდა, რომლის მიხედვითაც ბელარუსის სახელმწიფო უსაფრთხოების კომიტეტი და საქართველოს სახელმწიფო უსაფრთხოების სამსახური თანამშრომლობას აფორმებენ. დოკუმენტი 2016 წელს არის ხელმოწერილი, რომელიც ბელარუსში ძალაში შევიდა.

თავად სუს აცხადებს, რომ ბელარუსის უშიშროების კომიტეტთან გაფორმებული თანამშრომლობის ხელშეკრულება მხარეებს სახელმწიფო ინტერესების წინააღმდეგ მოქმედებას არ ავალდებულებს.

საქართველოს სახელმწიფო უსაფრთხოების სამსახურსა და ბელარუსის რესპუბლიკის სახელმწიფო უსაფრთხოების კომიტეტს შორის თანამშრომლობის შესახებ შეთანხმება 2016 წელს გაფორმდა. უწყების ოფიციალურ განცხადებაში წერია, რომ შეთანხმება მიზნად ისახავს მხარეებს შორის მჭიდრო თანამშრომლობის განვითარებას ტერორიზმის, კორუფციისა და სხვა სახელმწიფო უსაფრთხოების წინააღმდეგ მიმართული საერთაშორისო და ტრანსნაციონალური ორგანიზებული დანაშაულების წინააღმდეგ ბრძოლის საკითხებზე.

გაიგე მეტი: