თბილისის ადამიანის უფლებათა სახლი მოუწოდებს საქართველოს ხელისუფლებას, ბელარუსის უსაფრთხოების სამსახურთან 2016 წელს ხელმოწერილი თანამშრომლობის შეთანხმება საქართველოში არ აამოქმედოს.

მათი თქმით, 13 აგვისტოს ბელარუსის ოფიციალურ საკანონმდებლო ვებსაიტზე დოკუმენტი გამოქვეყნდა, რომლის მიხედვითაც ბელარუსის სახელმწიფო უსაფრთხოების კომიტეტი და საქართველოს სახელმწიფო უსაფრთხოების სამსახური თანამშრომლობას აფორმებენ. დოკუმენტი 2016 წელს არის ხელმოწერილი, რომელიც ბელარუსში ძალაში შევიდა.

ორგანიზაციის განცხადებით, დოკუმენტი ჯერჯერობით არ გამოქვეყნებულა საქართველოს საკანონმდებლო მაცნეს ვებსაიტზე, შესაბამისად, საქართველოში, სავარაუდოდ, მას იურიდიული ძალა ჯერ არ შეუძენია. თუმცა, მათი თქმით, არსებობს 2022 წლის 6 აგვისტოს დადენილება, რომელიც ამტკიცებს შეთანხმების ძალაში შესვლას და მის ასამოქმედებლად საჭირო შიდასახელმწიფოებრივი პროცედურების დასრულებას.

"შეთანხმების მიხედვით, მხარეები თანხმდებიან, რეგულარულად გაცვალონ ინფორმაცია, ოპერატიულად ითანამშრომლონ სხვადასხვა დანაშაულებთან საბრძოლველად, მათ შორის სახელმწიფოს სუვერენიტეტის, კონსტიტუციური მთლიანობის, სახელმწიფო უსაფრთხოების წინაღმდეგ ჩადენილი დანაშაულების წინააღმდეგ.

აღსანიშნავია, რომ ბელარუსის ავტორიტარული რეჟიმი სწორედ მსგავს უსაფუძვლო ბრალდებებს უყენებს უფლებადამცველებსა და უფლებადაცვით ორგანიზაციებს, რითაც ახშობს ბელარუსში კრიტიკულ აზრს, უხეშად არღვევს ადამიანის უფლებებს და კრძალავს ქვეყანაში უფლებადამცველების ლეგიტიმურ საქმიანობას", — აცხადებენ ორგანიზაციაში.

თბილისის ადამიანის უფლებათა სახლის განცხადებით, მნიშვნელოვანია, რომ საქართველოს მხარემ არ დაუშვას უსაფრთხოების სამსახურებს შორის დადებული შეთანხმების რეალური ამოქმედება, რადგან მათი თქმით, აღნიშნული დოკუმენტის გამოყენება საფრთხეს შეუქმნის საქართველოში დევნილობაში მყოფ ბელარუს ხალხს, განსაკუთრებით, უფლებადამცველებსა და აქტივისტებს.

"ბელარუსის ავტორიტარულ რეჟიმთან ამოქმედებული შეთანხმებით და მისი გამოყენებით, საქართველოს მხარე უხეშად დაარღვევს ადამიანის უფლებებს, საქართველოს კანონმდებლობას და საერთაშორისო ხელშეკრულებებით ნაკისრ ვალდებულებებს", — ნათქვამია განცხადებაში.

გამოცემა Sova-ს ცნობით, ბელარუსული ოპოზიციის ლიდერი სვეტლანა ტიხანოვსკაია მზად არის, რომ თბილისთან ბელარუსელი დევნილების უსაფრთხოების საკითხი განიხილოს. მედიის განცხადებით, ეს ინფორმაცია მათ საერთაშორისო საკითხებში ტიხანოვსკაიას თანაშემწმემ მიაწოდა.

საქართველოს სახელმწიფო უსაფრთხოების სამსახურსა და ბელარუსის რესპუბლიკის სახელმწიფო უსაფრთხოების კომიტეტს შორის თანამშრომლობის შესახებ შეთანხმება 2016 წელს გაფორმდა. უწყების ოფიციალურ განცხადებაში წერია, რომ შეთანხმება მიზნად ისახავს მხარეებს შორის მჭიდრო თანამშრომლობის განვითარებას ტერორიზმის, კორუფციისა და სხვა სახელმწიფო უსაფრთხოების წინააღმდეგ მიმართული საერთაშორისო და ტრანსნაციონალური ორგანიზებული დანაშაულების წინააღმდეგ ბრძოლის საკითხებზე.

ბელარუსში საპრეზიდენტო არჩევნების შემდეგ არაერთი მოქალაქე, აქტივისტი, ჟურნალისტი თუ უფლებადამცველი განსხვავებული აზრისა და პროტესტის გამო დააკავეს. დღეის მდგომარეობით, ბელარუსში 631 ადამიანი პოლიტიკურ პატიმრადაა მიჩნეული.