ტოკიოს პოლიციამ ქართველი პარალიმპიელი სპორტსმენი, სავარაუდოდ, დაცვის თანამშრომელზე ძალადობის ბრალდებით დააკავა. ინფორმაციას ამის შესახებ JapanTimes ავრცელებს.

გამოცემა წერს, რომ ძიუდოისტი, რომელსაც მომავალ კვირას პარალიმპიურ თამაშებზე უნდა ეასპარეზა, ეჭვმიტანილია უსაფრთხოების სამსახურის 60 წლის თანამშრომლისთვის ნეკნის გატეხვაში. JapanTimes-ის წყაროს ინფორმაციით, შემთხვევა ხუთშაბათს ტოკიოს სასტუროში მოხდა.

სპორტსმენი სასტუმროში კარანტინში იმყოფებოდა მას შემდეგ, რაც ქვეყნის გუნდის წევრს კორონავირუსი დაუდასტურდა. გამოცემა წერს, რომ დაცვის წევრმა ქართველ სპორტსმენებს ალკოჰოლის მიღების შემდეგ ხმაურის გამო გაფრთხილება მისცა, რის შემდეგაც მას დაზიანებები მიაყენეს.

თამაშების საორგანიზაციო კომიტეტის ოფიციალური წარმომადგენლის თქმით, ძიუდოისტი პარალიმპიური თამაშებიდან მოიხსნება და სახლში დაბრუნდება.

მომხდარს საქართველოს პარალიმპიური კომიტეტი "უმძიმეს ფაქტს" უწოდებს და იაპონურ მხარეს ბოდიშს უხდის.

"კომიტეტისთვის ეს არის უმძიმესი ფაქტი, რომელიც აზიანებს ჩვენი მოძრაობის რეპუტაციას და იმიჯს, რაც დიდი შრომის და თავდადების საფუძველზე მოვიპოვეთ ჩვენს წამრატებულ და საამაყო პარასპორტსმენებთან ერთად.

აღნიშნული ათლეტი ათვიცნობიერებს ჩადენილი ქმედების სიმძიმეს და ინანიებს მას, თუმცა მიუხედავად იმისა, რომ არის ოქროს მედლის მთავარი კანდიდატი, პარალიმპიადაზე მონაწილეობას ვეღარ მიიღებს", — წერია განცხადებაში.

ამასთან, აღნიშნულია, რომ მედიით გავრცელებული ინფორმაციის ნაწილი სიმართლეს არ შეესაბამება. კონკრეტულად ის, რომ თითქოს მთლიანად პარაძიუდოისტთა ნაკრები მონაწილეობდა ამ ინციდენტში და შესაბამისად, მათ და საქართველოს დელეგაციას პარალიმპიადიდან მოხსნის საფრთხე ემუქრება. ასევე ის, რომ თითქოს, ნაკრების წევრს დაუდგინდა კოვიდ 19.

განცხადებაში წერია, რომ ვირუსი დაუდგინდა მხოლოდ სპორტის სხვა სახეობის ერთ-ერთ მწვრთნელს, რომლის კონტაქტიც სავარაუდოდ ერთ-ერთი ქვეყნიდან მომავალი პარასპორტსმენია, რომელსაც ჩვენი მწვრთნელი აეროპორტში გადაადგილების დროს დაეხმარა. რაც შეეხება ნაკრებს, კომიტეტის ინფორმაციით, ნაკრების უმეტესობას არც გაუგია ამ შემთხვევის შესახებ.

"ამჟამად საქართველოს პარალიმპიური ნაკრების თითოეული წევრი კარგად გრძნობს თავს, 17 აგვისტოს შევალთ ოლიმპიურ სოფელში და აღვმართავთ საქართველოს დროშას, 25 აგვისტოდან კი დავიწყებთ ბრძოლას უმაღლესი და ისტორიული შედეგებისთვის", — ნათქვამია განცხადებაში.

პარალიმპიური თამაშები, რომელშიც მთელი მსოფლიოდან 4 400 სპორტსმენი მიიღებს მონაწილეობას, 24 აგვისტოს დაიწყება. კორონავირუსის გამო, პარალიმპიური თამაშებიც, სავარაუდოდ, მაყურებლების გარეშე ჩატარდება.