საქართველოს სახელმწიფო უსაფრთხოების სამსახური აცხადებს, რომ ბელარუსის უშიშროების კომიტეტთან გაფორმებული თანამშრომლობის ხელშეკრულება მხარეებს სახელმწიფო ინტერესების წინააღმდეგ მოქმედებას არ ავალდებულებს. ამის შესახებ სუს-მა საგანგებო განცხადებას მას შემდეგ გაავრცელა, რაც საქართველოს საერთაშორისო პარტნიორების მხრიდან არაერთი უარყოფითი განცხადება გაკეთდა.

"სახელმწიფო თავისი ინტერესების შესაბამისად ნებაყოფლობით ცვლის ინფორმაციას დანაშაულთან ბრძოლის მიმართულებით. შესაბამისად ეს ხელშეკრულება არ ავალდებულებს მხარეებს განახორციელონ ქმედება რაც ეწინააღმდეგება მხარეთა სახელმწიფო ინტერესებს. საქართველოს სახელმწიფო უსაფრთხოების სამსახურს მსგავსი ტიპის სამართალდაცვითი თანამშრომლობა გააჩნია არაერთ პარტნიორ ქვეყანასთან მთელი მსოფლიოს მასშტაბით, მათ შორის აშშ-სთან, ბრიტანეთთან, საფრანგეთთან, ლიეტუვასთან და ნატოსა და ევროკავშირის სხვა ქვეყნებთან", — ნათქვამია განცხადებაში.

ამასთან, სუს-ი მიიჩნევს, რომ ხელშეკრულებასთან დაკავშირებით დეზინფორმაცია ვრცელდება, რასაც სახელმწიფო უსაფრთხოების სამსახურის მიზანმიმართული დისკრედიტაციის მცდელობად აფასებენ.

"ქვეყნის უსაფრთხოებისა და სამართალდამცავი უწყებების დისკრედიტაციის პროცესში საერთაშორისო შეთანხმებების გამოყენება წარმოადგენს განსაკუთრებული შეშფოთების საგანს, რადგან შესაძლოა, ზიანი მიაყენოს საქართველოს სახელმწიფო ინტერესებს", — ნათქვამია უწყების განცხადებაში.

ბელარუსის სახელმწიფო უშიშროების კომიტეტსა და საქართველოს სახელმწიფო უსაფრთხოების სამსახურს შორის 2016 წელს დადებული თანამშრომლობის შეთანხმება ძალაში მიმდინარე წლის 1 აგვისტოს შევიდა. დოკუმენტი ბელარუსის პარლამენტის ვებგვერდზე 13 აგვისტოს გამოქვეყნდა.

დოკუმენტი 14 თავისგან შედგება და მიზნად ისახავს მხარეებს შორის მჭიდრო თანამშრომლობის განვითარებას ტერორიზმის, კორუფციისა და სხვა სახელმწიფო უსაფრთხოების წინააღმდეგ მიმართული საერთაშორისო და ტრანსნაციონალური ორგანიზებული დანაშაულების წინააღმდეგ ბრძოლის საკითხებზე.

გაიგეთ მეტი