ქართული ოცნების დეპუტატი, რატი იონათამიშვილი აცხადებს, რომ ჟიგიმანტას პავილიონისი საქართველოს "მეგობარი პოლიტიკოსი" არ არის. ასე ეხმაურება ის პავილიონისის კრიტიკას ქართული ოცნების მიერ შარლ მიშელის დოკუმენტის ანულირებაზე, ასევე, 5 ივლისის ძალადობაზე და მედიის უფლებებზე. იონათამიშვილი ამტკიცებს, რომ პავილიონისის განცხადებები ხშირად ემსახურება რუსეთის ინტერესებს, რაც დეოკუპაციის და დემოკრატიის თვალსაზრისით, "ნაცმოძრაობის იდენტურია".

"როდესაც ფაქტებს ამახინჯებ, ეს სუბიექტურობაზე და მიკერძოებაზე მიუთითებს. ქართული ოცნების მმართველობის პირობებში (როგორც არასდროს, დამოუკიდებლობის შემდეგ) ქვეყანაში დაუბრკოლებლად მაუწყებლობს მინიმუმ 5 ოპოზიციური ნაციონალური მაუწყებელი, არაერთი ბეჭდური თუ ონლაინ მედია და უმაღლესი სტანდარტით არის დაცული საქართველოს ყველა მოქალაქის სიტყვის თავისუფლება. ვინც ამას ვერ ხედავს, ის ან ქართული დემოკრატიის მტერია, ან ჩვენი ქვეყნის ევროინტეგრაციას აღიქვამს საფრთხედ. ფაქტია, რომ პავილიონისის სახით ნაცმოძრაობას და ოკუპანტ ქვეყანას საერთო გარესპიკერი ყავთ", — წერს იონათამიშვილი Facebook-ზე.

დეპუტატი იმედში სპეცრაზმის შესვლაზე, ასევე, მოდელირებულ ქრონიკაზე მიუთითებს და აღნიშნავს, რომ ახლა "ნაცების მეგობარი" ქართულ ოცნებას "არიგებს ჭკუას" მედიის თავისუფლებაზე.

ქართული ოცნების მიერ შეთანხმების ანულირებასა და 5 ივლისის ძალადობაზე, ასევე, მედიის უფლებებზე ლიეტუვის სეიმის საგარეო საქმეთა კომიტეტის თავმჯდომარემ, ჟიგიმანტას პავილიონისმა დღეს ისაუბრა. მისი განცხადებით, საქართველოს მთავრობამ ახლა უნდა გადაწყვიტოს, რომელ გზას ირჩევს — დასავლურს თუ რუსულს. მისი თქმით, ქართული ოცნების მიერ შარლ მიშელის დოკუმენტის ანულირება პარტნიორებთან კონსულტაციის გარეშე არასწორია. ამასთან, პავილიონისის თქმით, მედიასა და სიტყვის თავისუფლებაზე შეტევა ავტოკრატიაზე მიუთითებს.