დეპუტატი ალეკო ელისაშვილი სექსისტურ განცხადებას აკეთებს. მისთვის პარლამენტის სხდომათა დარბაზში ნაციონალური მოძრაობის წევრის, ნონა მამულაშვილის მაგიდაზე ასვლა მათ შორის იმიტომ იყო მიუღებელი, რომ ის ქალია.

ელისაშვილი ამბობდა, რომ არ მოეწონა ნაციონალური მოძრაობის დეპუტატების მოქმედება 18 ივლისს, შინაგან საქმეთა მინისტრის პარლამენტში ვიზიტისას და ყურადღება კონკრეტულ ფაქტებზე გაამახვილა.

"არც ეს მომეწონა, მაგიდაზე შეხტომა. კარგით ახლა, პარლამენტის წევრი რომ ხარ, ფეხზე რომ გაიხდი და მაგიდაზე შეხტები, ეგ რაში წერია და რა არის ეს?! მით უმეტეს, ქალი რომ ხარ", — განაცხადა ელისაშვილმა TV პირველის ეთერში.

ალეკო ელისაშვილმა გაიხსენა კიდევ ერთი ფაქტი, როცა შალვა პაპუაშვილმა თინა ბოკუჩავა ფიზიკური ძალის გამოყენებით პარლამენტის ტრიბუნიდან გამოიყვანა. ამ შემთხვევაში მან ქცევა პაპუაშვილს დაუწუნა.

"პაპუაშვილი როგორც მოექცა თინა ბოკუჩავას, ეს იყო აღმაშფოთებელი. არაფერში არ წერია ეს — ქალს რომ მოკიდებ კისერში ხელს, გვერდზე წამოიღებ და დააპერტყებ ლამის ძირს, ესეც არაფერში არ წერია", — განაცხადა ელისაშვილმა.

ის ამბობს, რომ მისთვის მიუღებელი იყო ნაციონალური მოძრაობის წევრების ქმედებები, თუმცა აბსოლუტურად სოლიდარული იყო ჟურნალისტების მიმართ, რომლებმაც გომელაურის სიტყვით გამოსვლის პარალელურად პლენარულ დარბაზში საპროტესტო ბანერი გადმოფინეს.

საუბარია 18 ივლისს, შინაგან საქმეთა მინისტრის, ვახტანგ გომელაურის პარლამენტში ვიზიტისას მომხდარ დაპირისპირებაზე. გომელაურის სიტყვით გამოსვლისას ჟურნალისტებმა პლენარული სხდომის დარბაზში გადმოფინეს ბანერი წარწერით — "დასაჯეთ მოძალადეები". პარალელურად, ოპოზიციონერმა დეპუტატებმა შს მინისტრს სიტყვა შეაწყვეტინეს და ტრიბუნასთან ლექსო ლაშქარავას ფოტოებით მივიდნენ. ქართული ოცნების დეპუტატმა, შალვა პაპუაშვილმა ნაციონალური მოძრაობის წევრი, თინა ბოკუჩავა პარლამენტის ტრიბუნიდან ძალის გამოყენებით გამოიყვანა. ბოკუჩავას განცხადებით, პირველად ამის მცდელობა ჰქონდა დეპუტატ ლევან მგალობლიშვილს, რომელსაც შემდეგ შალვა პაპუაშვილი შეუერთდა. გარდა ამისა, ირაკლი ზარქუამ ძალით ჩამოიყვანა ნონა მამულაშვილი მაგიდიდან, სადაც ის საპროტესტო პლაკატით ხელში იდგა და 5-6 ივლისის ძალადობრივი მოვლენების ორგანიზატორების დასჯას ითხოვდა. ნაციონალურმა მოძრაობამ აღნიშნული ფაქტებზე სამსჯელოდ პარლამენტის ეთიკის კომისიას მიმართა.

გაიგე მეტი: