პარტია ლელოს ერთ-ერთი ლიდერი, კახა კოჟორიძე ქართული ოცნების დეპუტატის, შალვა პაპუაშვილის მიერ კოლეგის, თინა ბოკუჩავას პარლამენტის თავმჯდომარის ტრიბუნიდან ძალით გაყვანას "გულისამრევ საქციელს" უწოდებს.

"შალვა პაპუაშვილი, რომელი ქართული ტრადიცია გვასწავლის ამას, ან რომელი ევროპული სტანდარტი, ან რომელმა კანონმა მოგცა ამის უფლება??? გულისამრევი საქციელია", — წერს კოჟორიძე.

შალვა პაპუაშვილმა თინა ბოკუჩავა ფიზიკური ძალის გამოყენებით გაიყვანა პარლამენტის თავმჯდომარის ტრიბუნიდან. როგორც ბოკუჩავა ამბობს, პირველად ამის მცდელობა ქართული ოცნების კიდევ ერთ დეპუტატს, ლევან მგალობლიშვილს, რომელსაც შემდეგ პაპუაშვილი შეუერთდა.

ხმაური და სიტყვიერი შეურაცხყოფა პარლამენტში მას შემდეგ დაიწყო, რაც ოპოზიციონერმა დეპუტატებმა შინაგან საქმეთა მინისტრს, ვახტანგ გომელაურს სიტყვა გააწყვეტინეს და ტრიბუნასთან გარდაცვლილი ოპერატორის, ლექსო ლაშქარავას ფოტოები გამოფინეს. ამის პარალელურად, პლენარულ სესიაზე ჟურნალისტებმა საპროტესტო ბანერი გადმოფინეს წარწერით — "დასაჯეთ მოძალადეები".

პროტესტის გამო მმართველმა გუნდმა გადაწყვიტა, რომ გომელაურის მოსმენა გადაედო.

"დაყენებული იქნა საკითხი უმრავლესობის მხრიდან, რომ ასეთ რეჟიმში განხილვის გაგრძელება ნამდვილად არ ემსახურება იმ მიზანს, რისთვისაც შევიკრიბეთ და დაინიშნა რიგგარეშე სხდომა. ამიტომ, დღევანდელ სხდომას ვაცხადებ დახურულად და საკითხზე ვიმსჯელებთ სხვა რიგგარეშე სხდომაზე", — განაცხადა პარლამენტის თავმჯდომარემ, კახა კუჭავამ.

გაიგე მეტი: